COVALIMA, 24 janeiru 2024 (TATOLI) – Pesoál saúde iha Covalima tama-sai eskola hodi hala’o atividade regulár ba vasina kontra tétanu (TT) ba estudante sira ho idade tinan neen mai kraik.
“Daudaun pesoál saúde sira hala’o vasina TT rotina ba estudante primeiru siklu ho idade tinan neen mai kraik atu haforsa sira-nian imunidade”, Diretora Servisu Saúde Covalima Maria Fátima Moniz, hatete iha Camnasa, ohin.
Inan-aman estudante, Lúcio Amaral, agradese ba pesoál saúde sira ne’ebé tama no sai eskola hodi fó imunizasaun regulár TT ba alunu sira hodi hasa’e sira-nian imunidade hodi prevene moras.
“Vasina TT ba ami-nian oan sira ne’e importante, nune’e ami nia-oan sira iha imunidade ne’ebé forte hodi prevene moras”, reitera.
Tétanu mak infesaun aguda no grave ida, kauza husi toxina bacilo tetániku Clostridium tetani, ne’ebé tama iha organizmu husi kanek ka lezaun kulit. La tranzmite husi ema ba ema, maibé liuhusi kontaminasaun kualkér tipu kanek ho esporu baktéria Clostridium tetani, ne’ebé hetan iha meiu ambiente.
Diretór Eskola Bázika Sentrál Ladi, Hermengildo Assis Martins haktuir pesoál saúde husu autorizasaun husi eskola no vasina estudante primeiru siklu iha loron 15 janeiru.
Alunu husi eskola Ladi hamutuk 71 mak simu ona imunizasaun hodi prevene sira husi moras difteria no tétanu.
Jornalista: Celestina Teles
Editora: Maria Auxiliadora
