iklan

COVALIMA, HEADLINE

Falur entrega livru istória no ekipamentu eskolár ba EBC Fohobua

Falur entrega livru istória no ekipamentu eskolár ba EBC Fohobua

Xefe Estadu-Maiór-Jenerál F-FDTL,Tanente-Jenerál Falur Rate Laek entrega livru istória Timor-Leste ba inspetór eskola , Imajen/Celestina Teles.

COVALIMA, 25  janeiru 2024 (TATOLI) – Xefe Estadu-Maiór-Jenerál FALINTIL-Forsa Defeza Timor-Leste (F-FDTL),Tanente-Jenerál Falur Rate Laek, entrega livru kona-ba istória Timór, materiál eskolár  no desportu ba Eskola Bázika Sentrál (EBC, sigla portugés) Fohobua, iha suku Lalawa, postu administrativu Tilomar, munisípiu Covalima.

“ Ha’u distribui materiál eskolár ne’e tuir ami-niam kbiit ne’ebé iha, hanesan jestu solidariedade hodi familializa ho komunidade no estudante sira no livru istoria Timor-Leste”, Falur Rate Laek hatete iha EBC Fohobua, ohin.

Atividade entrega materiál eskolár ba alunu sira ne’e hodi aproveita fahe informasaun kona-ba saida mak F-FDTL no nia istória sira, tanba bazeia ba esperiénsia bainhira fó teste ba kandidatu F-FDTL balun lakoñese estrutura forsa armada nian.

“Ho atividade entrega materiál eskolár ida ne’e, aproveita hodi fahe informasaun ba estudante sira atu iha ona koñesimentu, nune’e bainhira tuir teste atu sai F-FDTL iha bele hatene ona”, dehan.

Materiál eskolár ne’ebé entrega ba estudante iha EBC Fohobua  mak livru istória sira ho nia títulu Falur Nia Semo, Memória husi Falur Rate Laek, istória Maunana ho titúlu Umilde no Revolucionário,Taur Matan Ruak  Ser Livre é ser Capaz de Dizer Não no Haklehat Hahihak no Rasiskak Hakat Falintil-Forsa Defeza Timor-Leste Hori Otas Morin Nian to’o Agora no resvista F-FDTL, pasta-eskola, kadernu, lapijeira, lapis, uniforme ba desportu, bola no seluk tan.

Falur shusu ba profesór sira hanorin dixiplina sidadania ne’e tenke hanorin estudante kona-ba istória Timor-Leste no liuhusi distribuisaun livru hirak ne’e profesór sira bele halo esplikasaun sobre istória Timór ba alunu sira.

Estudante Melquiano da Silva Teligatal kontente bainhira simu vizita husi Xefe Estadu-Maiór-Jenerál hodi hasoru malu direta ho nia.

“Nia prezensa iha eskola ne’e ami bele rona direta nia ko’alia kona-ba istória Timor-Leste no fó motivasaun ba ami”, dehan.

Diretór EBC Fohobua, Juaquim dos Santos, agradese tanba foin hetan vizita dahuluk husi Xefe- Estadu-Maiór-Jenerál Falur Rate Laek.

EBC Fohobua iha nia eskola filiál mak Tilomar, Fatuk metan, Foho Lulik no Baer  ho totál estudante hamutuk 466 – estudante iha EBC Fohobua rasik iha 120 ho manorin na’in-sia husi númeru ne’e mane neen, feto tolu no tékniku administrasaun ida.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!