DILI, 25 janeiru 2024 (TATOLI) – Ministru Komérsiu no Indústria (MCI), Nino Perreira, dehan MCI, iha tinan-ne’e, prevee ona orsamentu rihun $200 hodi halo manutensaun ba Merkadu Taibesi no Manleuana.
“Iha tinan ne’e, ita prevee ona orsamentu rihun $200 ba Merkadu Manleuana ho Taibesi ba nia manutensaun. Ita hanoin merkadu sai hanesan sentru komersiál ida iha ita-nia rain”, Nino Perreira informa iha Ai-meti laran, ohin.
Nia esplika, objetivu hosi manutensuan ne’e atu akomoda númeru vendedór sira ne’ebé mak aumenta ba bebeik, entaun ida-ne’e Governu planeia hela atu asegura atividade ekonómiku ba komersiante sira ne’ebé hetan fatin ne’ebé mak dignu.
Nia esplika, estudu viabilidade iha área Merkadu Taibesi, daudaun ne’e, la’o ona tanba iha rai ektare 12, oinsá Governu reabilita didiak atu sai sentru komersiál hodi fasilita vendedór sira atu faan sasan no fasilita mós kompradór sira ho kondisaun ne’ebé mak di’ak liután.
“Ita implementa iha tinan ida-ne’e, ho estudu viabilidade, tanba ita iha ektare 12 iha área Merkadu Taibesi oinsá mak bele halo luan tan no dezenvolve tan, ita bele reabilita hodi halo didiak oinsá sai sentru komersiál hodi fasilita ita-nia vendedór sira atu faan sasan no fasilita mós ita-nia kompradór sira ho kondisaun ne’ebé mak di’ak liutan”, nia konklui.
Jornalista : Felicidade Ximenes
Editór : Zezito Silva
