VIQUEQUE, 25 janeiru 2024 (TATOLI)-Bispu Dioseze Baucau, Don Leandro Maria Alves, kinta ne’e, ofisialmente fó pose ba Padre Tomas de Aquino Guterres Lopes da Cruz, sai Amu pároku iha Viqueque Vila, munisípiu Viqueque.
Toma pose ne’e, ho baze ba despaixu husi dioseze Baucau ho númeru 08/07/2024, ne’ebé Bispu Leadro Maria Alves, ezonera padre pároku Imaculada de Conceção Viqueque, Evaristo António da Costa, hahú loron 24 janeiru 2024 no nomeia fali padre Tomas de Aquino Guterres Lopes da Cruz sai amu Pároku Viqueque Vila ho mandatu indeterminadu.
Iha serimónia pose, Don Leandro agradese padre Evaristo António da Costa ne’ebé durante ne’e sakrifika an tomak iha pároku Viqueque Vila hodi servi Maromak ho domin hamutuk ho sarani sira.
“Ohin, padre Tomas de Aquino Guterres Lopes da Cruz sai pároku foun iha Viqueque hodi kontinua misaun Maromak nian no hamutuk ho ita-nia sarani. Tan ne’e, ha’u husu sarani atu servisu hamutuk ho amu pároku foun servi ba parokia ida-ne’e”, hatete Don Leandro, iha igreja Imacaulada Viqueque Vila, ohin.
Don Leandro dehan pároku kontinua mantein iha sarani sira-nia fatin, maibé padre sira maka troka malu hodi servi no habelar Maromak nian liafuan ba sarani.
“Tanba ne’e sarani sira hamutuk ho amu lulik sira tenke tau matan nafatin ba pároku tanba ita-nia nesesidade ba fiar nian nomós ba formasaun pás ba vida umana”, Bispu ne’e sujere.
Biban ne’e, Padre Pároku sesante, Evaristo António da Costa, husu agradese ba sarani sira ne’ebé durante tinan lima hahú 2018 to’o 2024 servisu hamutuk hodi servi pároku ida-ne’e.
“Ha’u husu agradese wain ba sarani sira. Nu’udar ema ha’u rekoñese limitasaun matenek no esperensia, maibé sarani sira nia tulun iha atividade pastoral bele la’o di’ak,” Padre ne’e agradese.
Entretantu, Amu Pároku Foun, Padre Tomas de Aquino Guterres Lopes da Cruz, espresa sei servisu hamutuk ho sarani sira iha pároku Viqueque Vila hodi servi no hala’o misaun Maromak nian.
“Tanba ha’u mai halo tuir Maromak nian hakarak, maka servi sarani sira-ne’ebé pretense ba iha pároku Viqueque Vila. Maibé, ha’u konta ho sarani sira nian kolaborasaun,” Padre ne’e garante.
Antes ne’e Padre Tomas de Aquino Guterres Lopes da Cruz hala’o ninia misaun iha pároku Lautém durante tinan ualu, depois ida-ne’e kontinua fali iha dioseze Baucau.
Iha oportunidade ne’e adiministradór munisípiu Viqueque, Januário Soares “Bolly”, husu agredese ba padre Evaristo António da Costa ne’ebé durante ne’e serví ba sarani sira Viqueque Vila.
“Karik, durante ne’e ami sarani sira halo buat ruma la monu ba amu nian laran, ha’u lori sarani sira hodi husu deskulpa ba amu. Alende ne’e mós ami hato’o bemvindo ba amu pároku foun hodi mai hatutan no haklaken Maromak nian liafuan iha pároku ida-ne’e”, nia agradese.
Tuir dadús sarani katólika iha pároku Viqueque Vila husi suku 10 ho totál hamutuk 36.746.
Iha serimónia tomada pose ne’e hetan partisipasaun husi autoridade lokál, Diretór serbisu munisípiu Viqueque, komandante Polísia Nasionál Timor Leste (PNTL) munisípiu Viqueque no sarani pároku Viqueque Vila.
Jornalista: Vitorino Lopes da Costa
Editór : Florencio Miranda Ximenes
