DILI, 25 janeiru 2024 (TATOLI)—Prezidente Autoridade Munisípiu Manufahi, Luís Marçal da Costa Tavares, hateten, durante nia mandatu sei foku ba prioridade tolu.
“Foin lalais iha loron 11 janeiru 2024, ha’u ho estrutura simu ona pose nu’udar PAM Manufahi durante mandatu tinan-lima, ami sei foku ba prioridade tolu hanesan setór turizmu, agrikultura no infraestrutura,” Luís Marçal, informa ba Agência Tatoli, iha salaun Ministériu Administrasaun Estatál, Colmera, kinta ne’e.
Nia dehan, setór tolu ne’e importante maibé iha tempu badak sei foku liu ba asuntu turizmu no agrikultura.
“Iha tempu badak ita sei haree liuba asuntu turizmu no agrikultura, liu-liu setór turizmu komunitáriu, rezisténsia no turizmu sira ne’ebé kategoria istóriku hanesan pouzada no postu antigu sira ne’ebé tempu kolónia husik hela,” PAM akresenta.
Notísia relevante : Governu nomeia Prezidente Autoridade foun Ainaro, Manatutu no Manufahi
Autoridade munisipál iha ona planu tinan ne’e atu hadi’a postu antigu tempu kolónia hodi utiliza fali hanesan fatin turizmu, fatin aluga prepara ho kulinária no kafetaria hodi turista bainhira vizita bele toba no han-hemu.
Munisípiu Manufahi iha postu antigu neen ne’ebé presiza hadi’a iha postu administrativu hanesan Alas, Turiscai, Fatu-Berliu no Same.
“Ba agrikultura barak liu ita sei presiza hein planu hosi nasionál tanba ko’alia kona-ba agrikultura, liu-liu ba natar, ita presiza infraestrutura ne’ebé bele apoiu hanesan kanál irrigasaun no seluk tan,” nia akresenta.
Ba infraestrutura báziku, liu-liu ba estrada rurál sira ne’e sei serbisu hamutuk ho Programa Nasionál Dezenvolvimentu Suku (PNDS) hodi bele tau prioridade ba estrada sira ne’ebé urbana no rurál.
Kona-ba dezentralizasaun munisípiu liga ho poder lokál, Manufahi antes ne’e munisípiu, maibé agora muda ona ba autoridade munisípiu, ne’ebé iha kompeténsia a’as oituan kona-ba polítika no programa sira.
Manufahi iha tinan 2024 hetan orsamentu millaun $6,4, ne’ebé montante ne’e fahe ba saláriu no vensimentu, bens no servisu no kapitál menór.
PAM Manufahi, Luís Marçal da Costa Tavares, hetan pose hosi Ministru Administrasaun Estatál, Tomás Cabral, iha loron 11 janeiru 2024 hodi troka Arantes Isaac Sarmento.
Jornalista : Arminda Fonseca
Editora : Julia Chatarina
