DILI, 25 janeiru 2024 (TATOLI)-Universidade Nasionál Timor Lorosa’e (UNTL) hamutuk ho Universidade de Santa Catarina, Brasil – país membru ba komunidade lian portugés, lansa kursu mestradu ba Edukasaun, iha salaun Arkivu no Múzeu Rezisténsia (AMRT), Dili, ohin.
Reitór UNTL, João Soares Martins, hateten, lansamentu kursu mestradu Edukasaun iha Fakuldade Edukasaun, Arte no Umanitária (FEAH, sigla portugés) ne’e nu’udar ínisiu ida importante.
“Ita-nia estudante ba kursu mestradu na’in-33, feto na’in-10 no restante mane hotu, ida-ne’e di’ak tebes tanba primeira-ves UNTL lansa kursu mestradu iha Fakuldade Edukasaun Arte e Umanitária,” reitór UNTL ba jornalista sira hafoin lansamentu ne’e.
Ho ida-ne’e, autoridade másima UNTL espera katak tinan oin aumenta ka simu tan estudante foun no hakarak mós habelar estudante hosi universidade seluk ka Ministériu Edukasaun nia kandidatu hodi konkorre mós ba kursu mestradu.
Nia konsidera katak ne’e importante tebes ba Timor-Leste tanba aumenta tan rekursu umanu liuliu iha mestradu ba área edukasaun.
Reitór garante atu aposta iha kualidade. “Tanba ne’e mak ita loke kursu mestradu iha UNTL hodi atende ba kualidade profesór iha Timor-Leste”.
Líder másimu estabelesimentu ensinu públiku, João Soares Martins mós husu estudante mestradu sira tenke tuir demanda kurríkulu ne’ebé maki ha atu nune’e sira bele konklui sira-nia estudu tuir durasaun tempu.
“Espera katak sira na’in-33 ne’e kompleta estudu ho di’ak no remata tuir tempu ne’ebé iha. No, hein katak entre sira-ne’e laiha ida mak sai hosi kursu ne’e. UNTL prodús ona ema mestrandu liu 500 ne’e inklui fakuldade seluk,” nia hateten.
Nune’e mós, Diretór Sentru Estudu Kultura no Arte (CECA, sigla portugés), Vicente Paulino, solisita estudante mestradu na’in-33 ne’e esforsu aan nune’e bele alkansa objetivu ne’ebé mak planea ona.
“Mestrandu sira tenke esforsu makaas no peskiza tuir lina espesialidade ne’ebé iha nune’e bele alkansa mehi ne’ebé ita hakarak “, Vicente Paulino enkoraja.
Entretantu, oferta formativa área formasaun mestradu nian ne’ebé mak UNTL iha ona mak “Administração Educacional, Contabilidade, Direito, Enfermagem e Parteira, Língua e Linguística Portuguesa, Gestão Sustentável de Recursos Naturais e Ambiente, Medicina Tropical e Saúde Comunitária, Economia e Gestão Aplicadas, Políticas, Gestão e Avaliação Educacional, Serviço Social, Pediatria, Ensino de Português no Contexto de Timor-Leste, Matemática para professors, Estudos da paz e Conflito”.
Jornalista: Osória Marques
Editór: Rafael Ximenes de A. Belo
