DILI, 25 janeiru 2024 (TATOLI) – Komunidade sira ne’ebé hela iha bairru iha Dili bainhira utiliza dalan públiku tenke hato’o karta koñesimentu ba Polísia Tránzitu hodi uza ba atividade ruma, maibé laiha maka sei lahetan autorizasaun.
Utilizasaun via públika nia responsabilidade másima iha Polísia Tránzitu nia liman, tanba ne’e ba oin sei serbisu hamutuk ho Komando Polísia munisípiu Dili, inklui Ofisiál Polisiamentu Suku [OPS] atu halo sensibilizasaun ba regra tránzitu nian ba populasaun sira.
“Atu iha futuru hakarak taka dalan públiku hodi halo atividade tenke halo karta koñesimentu ba polísia”, Dehan Xefe Departamentu Tránzitu no Seguransa Rodoviária Nasionál, Superintendente Asistente Luís da Costa, iha Kuartel Jerál PNTL, Caicoli.
Xefe departamentu ne’e salienta katak, durante ne’e sira akompaña kuaze iha dalan públiku sira hanesan iha área Bairru Pité, ponte Maloa, Colmera, Bairro dos Grilhos, Bairru Sentrál kuandu akontese lia-mate ruma ka atividade divertimentu komunidade taka dalan públiku sein iha karta koñesimentu ba polísia.
“Tanba ne’e, hahú agora bá oin sei iha sosializasaun maka’as ba komunidade sira atubele hapara desizaun sira ne’ebé maka sira foti la bazeia ba regra tránzitu nian”, afirma.
Luís da Costa esplika mós katak maske iha ona karta koñesimentu ba polísia, durasaun tempu atu taka dalan publiku ne’e la’ós tempu naruk tuir komunidade nia hakarak. “Karik lia-mate ruma, ninia durasaun tempu ne’e loron tolu de’it, la’ós semana ida ba to’o loron 40 nia laran, ne’e labele. Tanba ne’e, sei iha sosializasaun ba komunidade iha Dili. Bá oin mak sira kontinua la kumpre regra, polísia sei husu responsabilidade ba autoridade suku, inklui na’in ba atividade atu responsabiliza sira-ninia asaun”, dehan.
Xefe suku Becora, António Soares, konkorda ho Polísia Tránzitu nia hanoin atu hato’o ba komunidade kona-ba regra tránzitu nian, liuliu taka dalan públiku sira, tanba durante ne’e seidauk iha koñesimentu sobre funsionamentu dalan públiku ba ema hotu.
“Ha’u hakarak duni atu iha sosializasaun, nune’e komunidade bele hatene tanba durante ne’e laiha, entaun sira halo buat hotu tuir sira-nian hakarak”, dehan.
Iha sensibilizasaun informasaun ne’e, nia sujere atu esplika mós kona-ba koima bainhira komunidade la kumpre, nune’e sira bele iha responsabilidade atu labele repete tan hahalok sira ne’e iha futuru.
Abitante suku Bairru Pité, Ricadro Correia, espera katak ho atividade ne’ebé polísia sei halo ne’e bele eduka katak nasaun ne’e iha lei no orden, tanba dalabarak iha komunidade balun maka uza sira-nian interese taka dalan publiku sira laiha koñesimentu husi autoridade lokál, inklui polísia.
“Ha’u konkorda kuandu polísia halo atuasaun ba komunidade sira iha bairru ne’ebé halo atividade taka dalan públiku, laiha koñesimentu ba autoridade sira. Ne’e di’ak liu atu eduka sira katak nasaun ne’e iha lei no orden, bainhira atu halo buat ruma tenke iha koñesimentu husi Estadu”, reitera.
Jornalista: Tomé Amado
Editora: Maria Auxiliadora
