DILI, 26 janeiru 2024 (TATOLI)—Diresaun Nasionál Transporte Terrestre (DNTT) seidauk halo rejista motór elétriku ki’ik sira ne’ebé daudaun sirkula hela iha territóriu nasionál.
“Loos duni, daudaun ne’e, motór elétriku kiik sira barak loos halo sirkulasaun iha kapitál Dili inklui munisípiu sira, maibé sira ne’e ema hatama fa’an la rejistu iha DNTT. Ita husu ba Polísia Nasionál Timor-Leste (PNTL) bele halo atuasaun tanba ida-ne’e ita la autoriza sira halai iha dalan públiku sira,” Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, informa ba Agência Tatoli, iha ninia knaar fatin, DNTT Balide, sesta ne’e.
Notísia relevante : Governu hapara provizóriu importasaun tum-tum
Nia dehan, parte seguransa bele halo atuasaun tanba motór elétrika ki’ik sira ninia funsaun loloos halai iha bairru laran de’it tanba la uza kapasete, maibé daudaun barak mak sirkula iha dalan públiku no Polísia la halo atuasaun.
“Ida-ne’e sei fó risku ba ema-nia vida. Antes ne’e ita serbisu hamutuk ho Polísia hodi halo atuasaun ba sapatu roda, entaun agora ne’e Polísia iha kompeténsia tomak bele halo atuasaun no regula sira,” nia tenik.
Jornalista : Arminda Fonseca
Editora : Julia Chatarina
