DILI, 26 janeiru 2024 (TATOLI) – Ministru Ensinu Superiór Siénsia no Kultura (MESSK), José Honório Jerónimo, informa, Komisaun ekipa ensinu superiór kompostu hosi MESSK, Ministériu Asuntu Kombatente Libertasaun Nasionál (MAKLN), Ministériu Solidariedade Sosiál no Inkluzaun (MSSI), Ministériu Edukasaun (ME) no Ministériu Administrasaun Estatál (MAE) mak hala’o prosesu ba koresaun ida-ne’e no semana rua tan anúnsia rezultadu ba públiku.
“Tanba ida-ne’e ami tenke ho kuidadu nune’e estudante ne’ebé asesu ba UNTL ne’e tenke ida-ne’ebé merese duni mak ba iha UNTL. Ita hein tan semana ida-rua bele anúnsia rezultadu ba públiku. Agora iha prosesu korresaun la’o hela no ami tenke haree ho di’ak no ho rigór”, MESSK dehan ba Tatoli, hafoin partisipa serimónia entrega ekipamentu simuladór partu nian ba ensinu superiór tolu, iha Kampu UNTL, Caicoli, Dili.
Husu kona-ba envolvimentu ministériu lima ne’e, MESSK hatán tanba iha relasaun ho rejime Espesiál ne’ebé la’o hela iha karaik.
“Purezemplu, ita-nia xefe suku ida mai ho deklarasaun katak ema ne’e kbiit laek mak ita mós tenke konsidera. Ha’u fiar tékniku sira sei servisu ho di’ak no rigór nune’e fó rezultadu ne’ebé di’ak “, dehan.
Governante subliña tan ligasaun ho rejime espesiál, rejime jerál no rejime oportunidade ne’e la siginifika veteranu nia oan atu tama hotu maibé veteranu nia oan ne’ebé kompete ka tuir ona ezame mak bainhira valór di’ak bele asesu. No, la’ós bolu ema tama de’it, lae. Anaunsér nia veteranu kedas.
“Atu asesu ba UNTL la’ós fasil, agora ami hasa’e valór 46 ba leten, signifika mai karaik labele. UNTL husu 4.000-resin no Institutu Politékniku Betano (IBP) kuaze 500, nune’e ami tenke haree didi’ak nune’e ema hotu bele satisfeitu ho rezultadu ne’ebé iha. No hein iha meadu fevereiru bele públika ona tanba prosesu ne’e besik remata ona”, remata.
Entretantu, Reitór Universidade Nasionál Timor-Leste (UNTL), João Soares Martins, dehan, komisaun ekipa ensinu superiór sei halo prosesu koresaun no tempu badak sei entrega mai UNTL.
Jornalista: Osória Marques
Editór: Rafael Ximenes de A. Belo
