Komisaun F iha PN husu fó tratamentu dignu ba ema ho moras lepra
DILI, 26 janeiru 2024 (TATOLI)-Membru komisaun F trata asuntu Saúde, Seguransa Sosiál no Igualdade Jéneru iha Parlamentu Nasionál (PN), Deputada Maria Teresa Gusmão, husu ba ezekutivu liuhusi ministériu kompetente atu fó tratamentu dignu ba ema ho moras lepra.
“Dalabarak ita hanoin laiha dignidade ita-nia ema moras liliu lepra, iha antigu ema hanoin lepra ne’e moras aat ne’ebé ita tenke izola tiha sira, maibé depois siénsia ba oin liu tan ema sira hanesan moras letra la’ós atu izola sira, maibé hakuak sira tau sira ba konsiderasaun hodi hala’o tratamentu lori ba saúde, sira-nia moris ho dignu para nivél moris hanesan ho ema di’ak,’’ Deputada membru komisaun F ne’e hateten ba Ajénsia TATOLI iha uma fukun PN, sesta ne’e, iha ámbitu komemorasaun loron Mundiál ba Moras Lepra ne’ebé mundu tomak inklui Timor-Leste rasik sei komemora kada tinan iha 30 janeiru.
Ba komemorasaun loron Mundiál Moras Lepra, tinan ne’e ho tema “Hapara estigma, haku’ak dignididade’’, tema ida ne’e aprezenta objetivu rua; hakotu estigma ne’ebé relasiona ho lepra no promove dignidade ema ho moras lepra.
Nune’e, Deputada husi bankada PD ne’e, dehan Governu liuhusi Ministériu Saúde (MS) ho Ministériu Solidariedade Sosiál (MSSI) iha devér bo’ot tebes atu tau matan ba maluk sira ne’ebé defisiénsia iha saúde atu haku’ak sira iha domin no atensaun hodi sira mós sente katak, hola parte iha mundu no nasaun ida ne’e.
Aliénde, Tuir Deputada membru komisaun F ne’e, katak durante ne’e haree mekanizmu tratamentu ba ema ho moras lepra presta mós iha madre sira hanesan husi madre CIJ iha knaar tau matan ba ema ho moras lepra sira no iha mós asosiasaun barak iha Timor-Leste ne’ebé hamrik estabelese atu bele tau matan ba ema ho defisénsia saúde. Inklui MSSI rasik fó apoiu ba organizasaun sosiedade sívil ne’ebé tau matan ba asuntu sosiál sira rasik.
“Maske dadus hatudu ita seidauk kobre hotu atendimentu iha territóriu ba defisénsia sira ho tipu oioin, inklui ema defisiénsia ho moras saúde, maibé ita espera ba oin bele fó atensaun boot asisténsia ho domin ba ema ho vunerável atu moris ho dignu hanesan ho maluk sira ne’ebé normál iha rai ida ne’e,” nia hateten.
Enkuantu, tuir dadus hahú tinan 2000 to’o agora Ministériu Saúde (MS) rejista kazu lepra liu ona ema na’in-5000.
Jornalista: Nelson de Sousa
Editór: Rafael Ximenes de A. Belo
