COVALIMA, 26 janeiru 2024 (TATOLI) – Padre Vigáriu, Joanico Mendonça, iha inaugurasaun kapela iha Ospitál Referál Suai husu ba profisionál saúde atu atende pasiente ho fuan tuir Kristu nian hahalok.
“Agradese ba ita-boot sira hetan kbiit no bensaun sira hodi fó asisténsia ba pasiente sira iha ospital hanesan mós hahalok Kristu nian, tuir hahalok kristaun nian nune’e tenke serbí pasiente ho fuan”, saserdote hato’o iha nia omília.
Nia salienta pesoál saúde tenke presta servisu hodi hatudu hahalok ne’ebé laran-luak no serbí pasiente loloron hanesan mós serbí Jesus Kristu, tanba nia hela hamutuk ho ema moras sira.
Diretór-Ezekutivu Ospitál Referál Suai, Geraldo da Cruz, dehan misa ida ne’e realiza atu tulun pesoál saúde badinas hodi servisu no atende ema moras ho laran.
“Liuhusi misa dahuluk ida ne’e parte ida hodi hasa’e orasaun, nune’e pesoál saúde servisu ho di’ak no laran-luak hodi atende pasiente sira iha Ospitál Referál Suai”.
Kapela ne’ebé ohin inaugura ne’e konstrui ho osan rihun rua-resin no nia verba mai husi Ministériu Saúde ne’ebé prosesu konstrusaun hahú iha setembru 2023 no finaliza iha janeiru 2024. Kapela ne’e ho nia medidade 6×9.
Jornalista: Celestina Teles
Editora: Maria Auxiliadora
