DILI, 26 janeiru 2024 (TATOLI)-Membru Parlamentu Nasionál (PN) husi bankada Kongresu Nasionál Rekonstrusaun Timor-Leste (CNRT) no bankada opozisaun, husi Partidu Libertasaun Populár (PLP) husu Governu atu haree mandatu Inspetór Jerál Estadu (IGE, sigla portugés).
Deputada husi bankada CNRT iha Parlamentu Nasionál (PN), Cedelísia dos Santos, husu, Governu presiza haree mandatu IGE ne’ebé kle’ur ona no ho estatutu nu’udar interinu de’it.
Notísia relevante: https://tatoli.tl/2018/02/15/ije-rejista-kazu-ma-administrasaun-aas-iha-2017/
“Ita-nia Primeiru-ministru (PM) mak haree asuntu sira ne’e, se tuir ami Parlamentu karik lei mak regula buat hotu, se nia mandatu ramata ona konserteza hakarak kontinua karik tenke fó fali nomeasaun foun ba ema ne’ebé hanesan, Karik ema foun, hanoin nia prosesu tenke nomeasaun foun,” Deputada husi bankada Governu ne’e hateten hodi responde Ajénsia TATOLI iha uma-fukun PN, sesta ne’e.
Nune’e kompeténsia tomak iha Primeiru-ministru (PM) ninia podér atu haree kona-ba ida ne’e.
Deputada husi bankada CNRT ne’e, ladun haree dezempeñu serbisu husi Inspetór Jerál Estadu ninian durante ne’e tanba la simu relatóriu.
“Ita kuaze ladun haree hetan karik, serbisu husi ita-nia Inspetór nian, ami husi PN mós ladun simu relatóriu husi ita-nia Inspetór Jerál kona-ba nia serbisu durante ne’e,” nia hateten
Ne’ebé, tuir membru órgau lejislativa ne’e, atu Inspetór ida foun atu mai ka tuan kontinua karik, ita presiza serbisu ne’e haluan nune’e PN no povu mós bele hatene kona-ba sira-nia serbisu, tanba realidade ita ladun rona Inspetór Jerál Estadu ninia serbisu.
“Ha’u, hanoin kuaze husi parte barak karik, tanba relatóriu de’it mós ami PN liliu komisaun C (trata asuntu Finansa Públika) la simu relatóriu ida husi Inspetór Jerál, karik fó ba Governu fó mai, maibé ami seidauk simu,” Prezidente Komisaun C iha PN ne’e hateten.
Entaun husi relatóriu mak, tuir deputada, “Ita bele deskreve katak, serbisu Inspetór iha área ne’e haree ba boagovernasaun ka orsamentu”.
Iha parte seluk, Deputada bankada opozisaun PLP, Hermenegilda da Costa Laurentina, husu Governu atu tau atensaun ba mandatu Inspetór IJE ne’ebé ho interinu.
“Governu tenke tau atensaun ba ida ne’e, karik interinu ne’e kle’ur loos ona, presiza troka ona tau ema méritu timoroan sira ne’ebé merese duni ou depende ba pozisaun ne’ebé iha nia nomeasaun polítika tenke eskolla ninia ema,” nia sujere.
Membru PN ne’e mós nota, katak serbisu sira ne’ebé di’ak durante Inspetór Jerál Estadu nian hala’o fanun mós ba instituisaun sira ne’ebé kazu sira iha katak, serbisu sira tenke integradu hodi haree ba asuntu ma-administrasaun no sira seluktan.
Entretantu, IGE nu’udar órgaun ba kontrolu no fiskalizasaun administrasaun públika no iha misaun atu halo kontrolu ba boa jestaun rekursu finanseiru, orsamentál no materiál sira iha servisu Administrasaun públika.
Jornalista: Nelson de Sousa
Editór: Rafael Ximenes de A. Belo
