DILI, 26 janeiru 2024 (TATOLI) – Rogério Lobato, Prezidente Autoridade Rejiaun Administrativa Espesiál Oé-Cusse Ambeno (RAEOA) promete sei serbisu maka’as durante nia mandatu atu serbí interese povu Oé-Cusse hodi lori dezenvolvimentu ba rai refere.
Rogério Lobato hatete hafoin hasoru malu ho Ministru Interiór, Francisco da Costa Guterres, hodi husu apoiu seguransa atu garante situasaun hakmante iha Oé-Cusse, tanba Ministériu Interiór mak kaer responsabilidade tomak kona-ba seguransa iha territoriu.
“Ami bá iha ne’ebá atu serbí povu Oé-Cusse. Ami Sei la haree ba partidu. Ha’u ema FRETILIN maibé ha’u apoiu maun Xanana hanesan Prezidente CNRT no PM inklui mós nu’udar kontinuadór Prezidente Nicolau Lobato nian to’o ukun rasik aan”, Rogério Lobato hatete hafoin remata enkontru ho Ministru Interiór, iha Caicoli, ohin.
Prezidente RAEOA ne’e salienta katak nia sei halo esforsu atu tane interese povu Oé-Cusse nian iha futuru no sei koopera ho líder nasionál atu lori rai ne’e bá oin.
Ministru Interiór, Francisco da Costa Guterres, hatete enkontru ne’e ko’alia kona-ba asuntu seguransa katak oinsá Ministériu Interiór bele fó apoiu seguransa ba RAEOA, nune’e autoridade sira iha ne’ebá bele hala’o sira-nian knaar ho di’ak.
“Ami ko’alia ona ho Prezidente Autoridade atu estabelese kooperasaun entre parte rua atu ami bele iha matéria seguransa, nune’e bele koloka ema tuir kada unidade sira ne’ebe estabelese iha Oé-Cusse ho di’ak liután”, dehan.
Husi parte ministériu prontu nafatin atu halo kooperasaun ho Prezidente Autoridade RAEOA ein termu seguransa ba RAEOA ida hakmatek.
Lembra katak Governu nomeia, iha 24 janeiru, liuhusi nia rezolusan Prezidente no membru REAOA ba mandatu tinan lima. Rezolusaun Governu ne’e ko’alia liu kona-ba nesesidade reestruturasaun no autonomia ba RAEOA tuir proposta iha programa Governu nian ho objetivu atu rekupera konfiansa populasaun, rekupera dinamizmu iha dezenvolvimentu ekonómiku no estabelese relasaun konfiansa ho interveniente sira hotu, populasaun, parseiru no parte interesada sira seluk.
Nomeiasaun Rogério Tiago Lobato hanesan Prezidente Autoridade RAEOA ho misaun prinsipál atu superviziona atividade desentralizasaun, eduka no mobiliza populasaun lokál ba envolvimentu konxiente ida iha dezenvolvimentu ekonómiku Enklave Oé-Cusse Ambeno nian.
Governu nomea mós sidadaun balun ba membru Autoridade RAEOA ba mandatu tinan-lima, André Lao, hanesan Sekretáriu Rejionál ba Administrasaun, Elvira Manat, hanesan Sekretária Rejionál ba Finansa, Luís de Jesus Neno, hanesan Sekretáriu Rejionál ba Saúde, Inácia Tamele, hanesan Sekretária Rejionál ba Edukasaun no Asuntus Sosiais, Filomena Sila, hanesan Sekretária Rejionál ba Agrikultura, no Marcelino Marques Coro, hanesan Sekretáriu Rejionál ba Terra no Propriedade, Rejistu no Notariadu.
Notísia relevante: Rogério Tiago Lobato nomeadu nu’udar Prezidente Autoridade RAEOA ba tinan-lima
Jornalista: Tomé Amado
Editora: Maria Auxiliadora