VIQUEQUE, 25 janeiru 2024 (TATOLI)- Sentru saúde iha postu administrativu Viqueque Villa, munisípiu Viqueque, hosi janeiru 2024, rejista moras Infesaun respiratóriu (ISPA) ho númeru a’as hamutuk 335.
“Iha fulan janeiru ne’e, moras ne’ebé númeru a’as liu maka ISPA hamutuk 335 kompostu hosi ema bo’ot no labarik ki’ik. Moras ne’e kauza hosi ambiente liuliu rai rahun, anin no udan”, relata Xefe sentru saúde postu administrativu Viqueque Vila, Celestina da Costa Alves,ba Agência Tatoli.
Atu prevene moras ISPA, nia husu ba komunidade sira bainhira la’o sai presiza uza maskára, hemu bee nono ka manas inklui tenke hakbesik aan ba fasilidade saude sira hodi hetan atendimentu.
“Ami mós halo pormosaun saúde ba abitante sira atu eduka ita-nia abitante sira hasa’e sira-nia koñesementu hodi halo prevensaun ba moras sira hanesan moras ISPA, diárea no moras sira seluk”, nia afirma.
Tuir dadús sentru saúde Viqueque Vila rejista moras diárea na’in-16, kazu ISPA na’in-335 no moras Pneumonia na’in-11.
Jornalista : Vitorino Lopes da Costa
Editór : Florencio Miranda Ximenes
