COVALIMA, 29 janeiru 2024 (TATOLI) – Koordenadór Bee Timor-Leste (BTL, E.P) Covalima, Castro Dody Ramos, informa, entre janeiru no dezembru 2023, BTL arrekada reseita $24.270,60 ba kofre Estadu.
“Reseita ne’e mai husi tarifáriu, tékniku BTL halo ligasaun bee-moos ba uma-kain foun sira no kliente sira sosa bee-moos litru 5000”, Castro Dody Ramos dehan, ohin.
Mekanizmu kliente sira selu bee ne’e aplika bazeia ba lei uza bee-moos 14m3 selu sentavu 0,20, ba kliente ne’ebé uza bee-moos ho tipu doméstika kada fulan selu $2,80, maibé depende ba utilizasaun bee, kada fulan balun bele selu $1-resin no seluk $2-resin.
Bazeia ba dadus husi BTL,E.P Covalima, kliénte iha área urbana ne’ebé asesu ona bee-moos iha zona haat iha na’in-1.251.
Kliente João Amaral hatete maske la asesu bee-moos durante oras 24, maibé nia satisfeitu tanba komunidade sira la buka ona bee ho distánsia ne’ebé dook.
“Ami satisfeitu maske BTL aplika tarifáriu. Ami ladún susar buka bee-moos atu hemu, atu hariis no fase roupa ne’e di’ak uitoan”, dehan.
Jornalista: Celestina Teles
Editora: Maria Auxiliadora
