LAUTEM, 29 janeiru 2024 (TATOLI) – Adolfo da Costa nudar Kordenador Eskola Sekundária Jerál Fernando Lasama informa katak Eskola Sekundária Jerál Fernando Lasama sei menus fasilidade hodi fasilita prosesu aprendizajen iha eskola refere. Fasilidade sira ne’e mak hanesan; menus sala de aula, meja no kadeira, biblioteka, no seluk.
Adolfo hato’o preokupasaun ne’e bainhira marka prezensa iha diálogue no sensibilizasaun programa dezenvolvimentu rural hala’o husi Ministériu Dezenvolvimentu Rural no Abitasaun Komunitariu (MDRAK), iha Postu Admintrativu Luro, sesta seman kotuk (26/01).
Adolfo relata alende menus fasilidade, eskola refere mos menus manorin hodi difikulta tebes prosesu aprendizajen.
“Ami iha estudante hamutuk 450 resin, maibe ita iha deit sala haat, no manorin nain 16. Entaun ami tenke uza sala de aula troka malu iha dader no lorokraik. Ida ne’e mak difikulta tebes prosesu aprendizajen iha eskola ne’e,” Adolfo hateten.
Hatan ba preokupasaun ne’e, Ministru Dezenvolvimentu Rural no Abitasaun Komunitariu (MDRAK), Mariano Assanami Sabino, hateten katak preokupasaun no ejizensia manorin nain sira nian ne’e sei rezolve iha tempu besik.
“Konaba problema Eskola Sekundária Jerál Fernando Lasama, hau sei kordena ho Ministériu Edukasaun hodi resolve. Enkuantu, konaba meja no kadeira hau promote sei distribui iha fulan fevereiru tinan ne’e,” dehan Ministru Assanami.
Vise Primeiru Ministru hateten kualidade edukasaun tenke hahu husi baze: “Tanba ne,e, iha Sensibilizasaun no Diálogu Dezenvolvimentu Komunitariu ida ne’e, ita lori mos parseiru sira husi seitor edukasaun hodi bele hare kona ba problema edukasaun iha baze.
“Ita tenke harii edukasaun husi baze tanba ne,e iha diálogu ida ne,e hau mos introduz parseiru organizasaun SOLS no sira pronto hamutuk ho mestre sira iha Luro hodi fo kursu iha lian Portugueza, lian Ingleza, no komputador ba estudante sira. Tanba ne,e hau husu ba estudante no joven sira hodi aproveita ida ne’e hodi fasilita imi iha prosesu aprendizajen,” Assanami haktuir.
Nia salienta tan katak edukasaun iha area rural presiza apoiu ho fasilidade adekuadu no kapasitasaun oi-oin hodi prepara joven sira ba futuru ida diak hodi kontribui ba alkansa prosesu dezenvolvimentu rural.
Jornalista: Camilio de Sousa
Editor: Filomeno Martins
