iklan

HEADLINE, KAPITÁL

Mudansa ba sinál tránzitu iha kapitál atu hamenus engarrafamentu

Mudansa ba sinál tránzitu iha kapitál atu hamenus engarrafamentu

Xefe Departamentu Tránzitu no Seguransa Rodoviáriu, Nasionál, Superintendente Asistente Luís da Costa. Imajan Tatoli/Natalino Costa.

DILI, 29 janeiru 2024 (TATOLI) – Polísia Tránzitu no Seguransa Rodoviária no Diresaun Nasionál Transporte Terrestre (DNTT) halo ona mudansa ba sinál tránzitu sira iha fatin neen iha kapitál ho objetivu atu hamenus engarrafamentu.

Fatin sira ne’e mak iha parte leste Banku Sentrál iha área Parlamentu Nasionál mai to’o iha edifísiu g7+, iha área loja Vaganza, iha Sentru Saúde Formosa, iha Tribunál, Mandarin mai to’o edifísiu GMN no iha Embaixada Xina nian.

“Informa ba públiku sira ne’ebé maka lori karreta no motór iha Dili, inklui sira husi munisípiu ne’ebé tun mai kapitál katak daudaun ne’e ami halo ona mudansa ba sinál tránzitu iha fatin neen iha Dili, tanba fatin sira ne’e sempre hamosu engarrafamentu”, Xefe Departamentu Polísia Tránzitu no Seguransa Rodoviária, Superintendente Asistente Polísia, Luís da Costa, apela ba motorista no kondutór sira atu kumpre regra.

Xefe departamentu ne’e haktuir katak husi fatin sira ne’ebé monta ona sinál tránzitu ho letra S husi área Parlamentu Nasionál nian sorin, inklui Palásiu Governu to’o edifísiu g7+ ne’e atu hatete katak la autoriza tan transporte sira para iha ne’ebá. Hanesan mós iha iha dalan públiku iha embaixada Xina nian, tanba iha área ne’e sempre hamosu engarrafamentu iha loron serbisu no sai serbisu.

“Ami husu ba maluk sira ne’ebé maka serbisu iha Palásiu Governu, inklui Parlamentu Nasionál atu koopera hodi kumpre regra sira ne’ebé maka Polísia ho DNTT monta ona, nune’e labele hamosu engarramentu iha fatin sira ne’e”, dehan.

Ba estrada públiku iha Sentru Saúde Formosa nian iha kampu demokrasia nia sorin, bandu ona transporte sira husi sentru sa’e bá loja BTK nian, tanba halo ona mudansa. Enkuantu husi loja Vaganza nian polísia mós monta ona sinál tránzitu ho letra P katak transporte saida de’it bele para iha ne’ebá, maibé ho kondisaun transporte moris hela no para ho tempu ne’ebé lalais de’it.

“Ita sei halo sosializasaun semana ida iha kampu atu motorista sira bele komprende no hatene, maibé bá oin kuandu sé mak kontra regra sei fó sansaun ba sira”, afirma.

Motorista mikrolete 09 ne’ebé movimenta husi diresaun Pantai Kelapa, Palásiu Governu no Mandarin, Joaquim Carvalho, hatete tenke kumpre sinál sira ne’e tanba Polísia Tránzitu no DNTT mak hamutuk halo mudansa ba sinál sira signifika sira observa kondisaun maka halo mudansa atu halo kapitál labele iha engarrafamentu.

“Ha’u hanesan motorista mikrolet 09 toman ona ho regra sira, ne’ebé buat ne’ebé sira halo ne’e atu regula ema ne’ebé uza transporte iha dalan publiku sira atu disiplina hodi kumpre sinál tránzitu”, realsa.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!