PN designa vogál na’in-rua ba Konsellu Superiór Defensoria Públika
DILI, 29 janeiru 2024 (TATOLI)—Parlamentu Nasionál (PN), segunda ne’e, iha reuniaun plenária liuhosi eleisaun sekretu designa vogál permanente ida (1) no vogál suplente na’in-ida (1) ba Konsellu Superiór Defensoria Públika.
“Ita iha kórum (Deputadu) 56, mais rezultadu votasaun a-favór 32, kontra 24 no abstensaun 0, ne’ebé pasa,” Prezidente Parlamentu Nasionál, Maria Fernanda Lay, hato’o iha sala plenária PN.
Kandidatu na’in-rua ne’e halo submisaun aprezenta hosi bankada CNRT kompostu hosi kandidatu vogál permanente ba Konsellu Superiór Defensoria Públika mak Crisencio dos Santos no kandidatu suplente Ricardo da Costa Fernandes Hornai.
Tuir artigu 13 númeru 1 iha “d” hosi dekretu-lei númeru 38/2008 Estatutu Defensoria Públika, kompoin vogál sira ba Konsellu Superiór Defensoria Públika, vogál na’in-ida no vogál suplente na’in-ida designadu hosi Parlamentu Nasionál.
Tuir termu aseitasaun, Crisencio dos Santos ne’ebé hato’o ba meza PN katak nia-parte aseita nomeasaun ne’e no kompromete kumpre dever no responsabilidade funsaun ne’e, importánsia knaar hanesan vogál iha Defensoria Públika ne’ebé dezempeña papél fundamentál promosaun direitu umanu iha protesaun ba ema vunerável asesu justisa ba sidadaun hotu, nune’e agradese ba konfiansa hosi PN.
Jornalista : Nelson de Sousa
Editór : Cancio Ximenes
