VIQUEQUE, 29 janeiru 2024 (TATOLI)– Diretór SEFOPE munisipál Viqueque, Simões da Silva, dehan ba tinan 2024 kontinua loke formasaun iha área lima hodi fó oportunidade ba joven Viqueque-oan sira atu kompete iha postu traballu.
Área formasaun lima ne’e mak hanesan pedreiru,karpinteiru, eletrisidade, kanalizasaun no soldadura. Formasaun ne’e sei oferese mós sertifika ba nivél I ho II.
Prosesu rejistu sei hahú loron 5 to’o 16 fevereiru 2024 ho nia kritériu atu rejista ba área formasaun sira-ne’e mak kandidatu tenke iha kartaun evedénsia husi SEFOPE, kartaun eleitorál no Billeti Identidade. Enkuantu formasaun ne’e hala’o iha sentru formasaun Beaço.
“Loke formasaun ba ita-nia joven sira hodi hasa’e sira-nia abilidade hodi bele kompate iha postu traballu”, Diretór ne’e hateten ba Agência TATOLI, iha ninia kna’ar fatin, edifisíu, segunda ne’e.
Formasaun ida-ne’e, SEFOPE oferese ba joven Viqueque-oan sira husi tinan 17 to’o 30 bele bá rejista hodi asesu ba formasaun refere.
“Daudaun ne’e, ita iha formasaun ba área lima atu aumemta tán formasaun lian Inglés no lian Japaun ninia”, nia akresenta
Tarjetu simu estudante ba tinan 2024 sentru formasaun Beaço presiza joven hamutuk na’in-120 hodi bele akumula iha sala ida iha formanadu na’in-20.
“Tan ne’e, husu ba joven Viqueque-oan sira hodi aproveita oportunidade ne’e hodi partisipa iha formasaun hodi sai hanesan bukae ba joven sira iha future,” Diretór ne’e sujere.
Tuir dadús formandu husi sentru formasaun Beaço husi tinan 2023 mak fó graduasaun ona ba estudante hamutuk na’in-54.
Jornalista: Vitorino Lopes da Costa
Editór : Florencio Miranda Ximenes
