VIQUEQUE, 29 janeiru 2024 (TATOLI)-Servisu Edukasaun munisípiu Viqueque hamutuk ho organizasaun naun govermentál Belun, segunda ne’e, halo ona abertura no simu dokumentu hosi kandidatu professór ne’ebé kompete konkursu ba profesór.
“Ohin, ami halo abertura hodi hahú simu dokumentu hosi kandidatu profesór ne’ebé kompete ba vaga rekrutamentu profesór ba engresu espesiál nian,” Diretór servisu Edukasaun munisípiu Viqueque, Domingos Brandaõ, hateten ba Agência TATOLI, iha ninia kna’ar fatin, Beloi, ohin.
Rekrutamentu ida-ne’e, nia afirma Minsitériu Edukasaun kontratu ho ONG Belun maka tau matan ba prosesu rekrutamentu. Edukasaun Viqueque fó apoia tékniku no ekipa hosi Ministériu Edukasaun (ME) maka halo monitorizasaun ba prosesu rekrutamentu sira-ne’e.
Mekanizmu rekrutamentu, nia dehan Ministériu Saúde halo rekrutamentu jerál iha munisípiu Viqueque, hafoin kandidatu sira liu maka ME koloka sira ba munisípiu no koloka tután ba kada eskola sira.
“Iha munisípiuViqueque kuaze profesór kontratadu no reklamante submeter hotu sira nia dokumentu ba komepete vaga ne’e hamutuk 200-resin”, nia afirma.
Diretór munisipál ne’e mós husu ba profesór kontratadu, reklamante no joven sira lisensiatura sira-ne’ebé atu hakbesik aan ba sevisu edukasaun hodi konkorre ba vaga professor refere.
Tuir dadus iha 2023 iha munisípiu Viqueque profesór kontratadu na’in-155 no profesór voluntáriu no reklamante na’in-116.
ME loke vaga ba pre-eskolár no ensinu báziku totál 2.400, kompostu husi pre-eskolár na’in-200, primeiru síklu no segundu siklu ensinu báziku na’in-1.000, terseiru síklu ensinu báziku 1.200.
Entretantu, rekrutamentu ne’e hahú loron 29 janeiru sei ramata iha 9 fevereiru 2024.
Jornalista: Vitorino Lopes da Costa
Editór : Florencio Miranda Ximenes
