Ahi-han uma MDG ida iha aldeia Baha-Bunak Viqueque
VIQUEQUE, 30 janeiru 2024 (TATOLI)-Ahi-han uma MDG ida iha área Kararas, aldeia Baha-Bunak, suku Uma-Ki’ik, postu Viqueque Vila, munisípiu Viqueque tanba kauza hosi sikuitu eletrisidade.
Insendiu ne’e akontese iha horisehik (29/01), maizumenus tuku 10:00, dader, akontesementu ne’e halo vitìma Moises Guterres (idade 40) ho feen no oan na’in-rua la konsege salva nia sasan uma laran.
“Bainhira akontesimentu insendiu ne’e, ha’u mobiliza komunidade sira hodi hasa’i sasán sira uma laran, maibé balun ami konsege salva no balun la konsege salva”, informa Xefe Aldeia Baha-Bunak, Marcal Babtista Brandão, hateten ba Agência TATOLI, iha fatin akontesimentu, tersa ne’e.
Maske, nia dehan komunidade, ekipa Bombeiru no PNTL Viqueuque ho esforsu rega bee ba uma ne’ebè ahi-han, maibé la konsege hamate, nune’e vitima nia sasan uma laran balun la konsege salva.
Xefe Aldeia ne’e esplika, sasan uma laran ne’ebè ahi mutuk mak sasan dapur, ropa sira, kama ida no materia konstrusaun balun.
Daudaun ne’e, nia dehan Autoridade Protesaun Sivil halo ona identifikasaun hodi fò apoia emerjènsia ba vitima ho nia membru família na’in-haat.
“Vítima sira, ami muda provizóriu bá hela uma tali ida, ne’ebé besik iha vítima sira-nia uma. bainhira sira konstrui di’ak fali sira-nia uma mak ba hela fali iha laran”, nia afirma.
Iha fatin hanesan, Adjuntu Autoridade Protesaun Sivil (APC) Munisípiu Viqueque, Cirilio Soares Gomes, afirma akontesimentu insendiu ba uma MDG ne’e halo identifikasaun ona tanba kauza hosi sirkuitu eletrisidade.
“Nune’e, ami-nia ekipa ba distribui ona pakote emerjénsia liuliu ba hahan sira-ne’ebé nesesidade báziku hanesan foos, mina, sardine, bikan, kanuru, supermie no terpal no seluk tan, atu nune’e ita-nia vítima bele auguenta sira moris hafoin mak ita fo tan materia konstrusaun”, Cirilio konta.
Jornalista: Vitorino Lopes da Costa
Editór : Florencio Miranda Ximenes
