DILI, 30 janeiru 2024 (TATOLI) – Governu Austrália, liuhusi Polísia Federál Austrália (AFP, sigla inglés) disponibiliza millaun AUD$35 hodi dezenvolve Polísia Nasionál Timor-Leste (PNTL), liuliu Servisu Investigasaun Kriminál (SIK) nian nomós atu realiza formasaun ba membru sira iha área lideransa no administrasaun, inklui atu dezenvolve polísia komunitária.
Ministru Interiór, Francisco da Costa Guterres, hatete Austrália kontinua tulun dezenvolvimentu PNTL, tanba daudaun ne’e sira apoia atu estabelese laboratóriu ida kona-ba investigasaun kriminál nian.
“Fundu ne’e Governu Austrália fó mai PNTL, liuhusi programa TLPDP [The Timor-Leste Police Development Program] ne’ebé koopera ho AFP atubele dezenvolve fundu sira ne’e ba item ne’ebé maka determina ona, nune’e bele dezenvolve no kapasita membru sira atu hetan abilidade hodi lori progresu ba PNTL iha futuru”, Ministru Francisco hatete hafoin hasoru malu ho Ministru Defeza Indústria no Ministru Dezenvolvimentu Internasionál no Pasífiku Austrália, Pat Conroy, iha Caicoli, ohin.
Ministériu Interiór no Komando Jerál PNTL agradese ba Governu Austrália, liuhusi TLPDP tanba programa ne’e hetan konsiderasaun atu konsolida Polísia Timor-Leste bele hala’o ninia servisu ho di’ak liután.
Husi enkontru ne’ebé ezekutivu rua halo ne’e diskute oinsá atu jere apoiu ne’ebé Austrália, nune’e bele fó impkatu pozitivu ba dezenvolvimentu seguransa iha rai-laran.
Ministru Defeza Indústria no Ministru Dezenvolvimentu Internasionál no Pasífiku Austrália, Pat Conroy, dehan Austrália iha nafatin kompromis atu tulun PNTL tanba Austrália hakarak dezenvole Polísia Timor-Leste iha futur.
“Ha’u kontente tanba bele diskutie asuntu polísia nian ho Ministru Interiór. Ami iha kompromis atu konsolida Polísia Timor-Leste atubele hala’o ninia servisu ho di’ak liután”, reitera.
Notísia relevante: TLPDP disponibiliza Robot esplozaun ba PNTL
Jornalista: Tomé Amado
Editora: Maria Auxiliadora
