DILI, 30 janeiru 2024 (TATOLI)—Centro Nacional Chega, Institutu Públiku (CNC, I.P) iha tinan 2024 ne’e sei nafatin kontinua programa prioridade tolu ne’ebé antes ne’e implementa ona.
“Orsamentu Jerál Estadu (OJE) 2024 ne’ebé aloka mai ita ne’e hamutuk $1.804.377, foku ba programa prioridade tolu hanesan kultura no patrimóniu, funsionamentu dezenvolvimentu instituisionál no inkluzasaun sosiál,” Diretór Ezekutivu CNC, I.P, Hugo Maria Fernandes, informa ba Agência Tatoli, via telefónika, tersa ne’e.
Programa prioridade tolu ne’e bazeia ba polítika prioridade IX Governu ne’ebé nu’udar derivasaun hosi planu estratéjiku CNC, I.P tinan 2021-2025.
Orsamentu $1.804.377 kompostu ba kategoria saláriu no vensimentu $750.000, bens no servisu $720.757, tranferénsia públika $241.148, kapitál menór laiha no kapitál dezenvolvimentu $92.472.
Kona-ba programa kultura no patrimóniu ne’e fahe ba sub programa tolu hanesan dezenvolvimentu arkivu, ne’ebé kontinua peskiza istóriku sira hanesan komunidade istória no harii muzeu memoriál iha munisípiu sira.
“Harii muzeu memoriál ne’e iha tinan kotuk ita harii ikus iha munisípiu Bobonaro no tinan ne’e planu atu harii tan ida iha parte leste nian, maibé fatin seidauk determina tanba sei iha kooperasaun CNC, I.P ho Prezidente Autoridade sira,” nia akresenta.
Notísia relevante : CNC tau importánsia ba programa prioridade tolu iha 2022
Programa inkluzasaun sosiál iha sub programa rua mak hanesan hakbiit organizasaun sobrevivente sira, ne’ebé CNC, I.P sei kontinua fó apoiu ba asosiasaun vítima, asosiasaun no antigu prizioneiru polítiku, sub programa ikus kontinua apoiu organizasaun sosiedade sivíl sira hanesan ACbit, AJAR no seluk tan ne’ebé mak sira sei apoiu vítima sira.
“Ba funsionamentu dezenvolvimentu instituisionál ne’e barak liu ita haree ba jestaun internál nian, oinsá haree ba rekursu umanu, jestaun finansa no seluk tan,” Diretór tenik.
Orsamentu ba kultura no patrimóniu rasik $124.770, kompostu hosi saláriu vensimentu, kapitál menór no kapitál dezenvolvimentu laiha, enkuantu bens no servisu $89.770 no transferénsia públika $35.000.
Programa funsionamentu no dezenvolvimentu instituisionál ho nia orsamentu hamutuk $1.149.845, kompostu hosi saláriu no vensimentu $750.000, bens no servisu 307.373, kapitál dezenvolvimentu $92.472.
Ba programa inkluzaun sosiál ho orsamentu hamutuk $210.723, kompostu hosi bens no servisu $42.535, transferénsia públika $168.188, enkuantu saláriu vensimentu, kapitál menór no kapitál dezenvolvimentu laiha orsamentu.
Jornalista : Arminda Fonseca
Editora : Julia Chatarina
