Deputadu FRETILIN husu Governu tau atensaun ba ponte Karau Ulun

DILI, 30 janeiru 2024 (TATOLI)-Deputadu husi bankada FRETILIN, Antoninho Doutel Sarmento, husu Governu liuhosi ministériu kompetente atu tau atensaun ba ponte Karau Ulun, iha postu administrativu Same, munisípiu Manufahi.
“Ita iha ponte boot ida Karau Ulun, ha’u lahatene, ministériu sira ba haree asuntu ida-ne’e ka lae, iha ponte okos dalan ba aldeia Sesurai ne’e ninia aliserse ne’e bee-mota hahú kee sai. Ne’e tenke fó atensaun, se la fó atensaun mak ponte sei lori risku boot liután. Ida-ne’e tanba saida, tanba ponte ida-ne’e liga komunidade sira hosi Tasi-Mane ba Viqueque, Natarbora. Se ponte ne’e kotu ne’e, iha risku boot tebes,” nia levanta lihosi reuniaun plenária PN, tersa ne’e.
Tanba ne’e, nia husu ba parte ezekutivu liuhosi Ministériu Obra Públika (MOP) atu fo atensaun kazu ida-ne’e.
Iha parte seluk, Deputada FRETILIN, Cristina Rebelo, hato’o ba Governu atu fó atensaun ba estrada Laclubar iha Manatuto.
“Hakarak hato’o no husu ba Governu estrada hosi Simpang Tiga to’o ba Laclubar Vila pelumenus kilómetru 10 kondisaun aat tebes. Ami simu informasaun katak konkursu ne’ebé durante ne’e hala’o ona fulan tolu, maibé laiha notísia to’o agora. Husu Governu tau mós prioridade atu nune’e ita ajuda ita-nia komunidade iha baze, ita ko’alia kona-ba diversifikasaun ekonómika entaun haree mós ba dalan,” nia hateten.
Alíende, ne’e membru hosi órgaun lejislativa ne’e, husu mós tau atensaun ba estrada Lautém to’o ba Lospalos Vila, ne’ebé hahú hosi VI Governu Konstitusionál iha 2016 komesa kee ona estrada, maibé to’o agora la hadi’a Estrada refere no difikulta tebes populasaun movimenta ba-mai liuliu iha tempu bainhira udan monu rai.
Iha reuniaun plenária, Vise Ministru ba asuntu Parlamentár, Adérito Hugo da Costa, rejista deputadu.a sira-nia preokupasaun hirak ne’e no sei enkamiña ba ministériu tutela.
Jornalista : Nelson de Sousa
Editór : Cancio Ximenes

