iklan

COVALIMA

Komunidade bele informa ba APC atu tesi ai-hun boot besik uma

Komunidade bele informa ba APC atu tesi ai-hun boot besik uma

Komandante APC Covalima, Inspetór Xefe Flávio Mendes. Imajen Tatoli/Celestina Teles.

COVALIMA, 30 janeiru 2024 (TATOLI) – Autoridade Protesaun Sivíl (APC, sigla portugés) Covalima husu ba komunidade sira ne’ebé nia hela fatin risku tanba besik ai-hun boot maka hato’o ba APC atubele tesi ai refere.

Komandante APC Covalima, Inspetór Xefe Flávio Mendes, informa katak bazeia ba prevezaun tempu husi Diresaun Nasionál Meteorolojia, iha posibilidade akontese tan anin-boot durante loron tolu.

“Husu komunidade ne’ebé nia hela fatin ameasa tanba besik ai-hun boot sira bele hato’o informasaun nune’e APC liuhusi Bombeiru bele tesi ai”, Inspetór Xefe aviza, ohin.

Aleinde ne’e, nia mós fó atensaun ba populasaun Covalima bainhira akontese anin-boot labele halo viajen no hamriik iha ai-hun boot okos, nune’e bainhira ai tohar labele fó risku ba vida.

Daudaun APC Covalima rejista ema na’in-63 sai vítima ba dezastre naturál kauza husi anin sobu uma no mós ahi han uma sia.

Vítima 63 ne’e nia uma ho kondisaun aat tiha totál iha 35, aat naton hitu no kmaan 21 ne’ebé fó ona apoiu emejénsia ai-han no la’ós ai-han hodi hein apoiu materiál reku perasaun nian.

Abitante Deolindo Carvalho dehan Autoridade Protesaun Sivil fó sai ona informasaun,  nune’e bainhira akontese anin-boot labele fó impaktu ba ema nia vida.

“Komadante APC fó atensaun ona, nune’e molok akontese dezastre ruma bele prevene”, dehan.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!