VIQUEQUE, 30 janeiru 2024 (TATOLI)-Diretór Programa Dezenvolvimentu Integradu Munisipál (PDIM), Domingos Montero de Carvalho, hateten daudaun Diresaun PDIM munisípiu Viqueque laiha ona pesoál enjeñeiru hodi kontrola projetu sira-ne’ebé seidauk finaliza.
“Agora, ami hasoru dezafiu bo’ot tanba empreza sira hala’o hela servisu ka ezekuta hela projetu PDIM, maibé ekipa enjeñeiru PDIM labele tun ba treinu hodi halo monitorizasaun tanba enjeñeiru PDIM na’in-9 maioria ajente administrasaun públiku, nune’e sira tenke asina kontratu maka foin ba servisu hodi fó intrusaun ba empreza implementadór sira”, Diretór ne’e hateten ba Agência TATOLI,I.P, iha ninia kna’ar fatin, administrasaun munisípiu, tersa ne’e.
Projetu 2023 husi PDIM ne’ebé la’o hela maka hanesan projetu armazenamentu ai-moruk, Ensinu Báziku Filial (EBF) Cailaquebabo Babu postu Lacluta, moru hale’u rezidénsia administrasaun no reabilitasaun rezidénsia administradór nian.
“Ha’u simu despaixu husi administradór katak labele autoriza enjeñeiru sira ba treinu tanba sira seidauk asina kontratu ne’e dezafiu boot ida atu garante kualidade projetu sira ne’e”, nia lamenta.
Nune’e, nia husu ba Governu bele tau atensaun hodi enjeñeiru sira bele halo fali serbisu atu monitoriza projetu hirak ne’e.
Projetu PDIM iha tinan 2023 ne’ebé seidauk finaliza maka hanesan EBF Cailaquebabo, postu Lacluta ho kustu obra $109.908,19, implementa husi empreza MOT-Quim Unip.Lda, rezidénsia administradór ho moru no jardím iha suku Caraubalu, postu Viqueqeu Vila ho kustu obra $470.225,91, responsavél husi empreza Paceful Unip.Lda, armazein ai-moruk iha suku Caraubalu, postu Viqueque Vila ho kustu obra $144.286, implementa husi empreza Belas Lari.
Tuir dadús enjeñeiru serbisu iha PDIM hamutuk na’in-9 kompostu husi arsitètiku na’in tolu, tekniku sivil na’in-6.
Empreza Peaceful, Unip,Lda sente preokupadu
Entretantu, Jestór empreza Peaceful Unip.Lda, Pascoal Vital, informa, daudaun ne’e, progresu ba reabilitasaun moru protesaun no jardín ba rezidénsia administradór munisípiu Viqueque atinje ona 55%.
“Projetu ba reabilitasaun rezidénsia ami-nia progresu servisu atinje ona pursentu 55%. Ami kontinua esforsu hodi finaliza projetu ida-ne’e iha tinan 2024”, Jestór Pascoal Vital, hateten ba jornalista sira, iha rezidénsia administradór, suku Caraubalu, kinta-ne’e.
Empreza Peaceful kompromete aseleira servisu hodi kumpre kontratu ne’ebé halo ho Governu.
“Projetu ne’e la’ós projetu foun, maibé halo reabilitasaun uma antiga bainhira empreza halo mudansa ba item ruma, presiza akompaña enjiñeiru husi Programa Dezenvolvimentu Integradu Munisipál (PDIM) Viqueque”,nia afirma.
Maibé, nia dehan hasoru dezafiu oituan tanba agora laiha enjiñeiru ida maka akompaña ami-nia servisu.
“Ami hasoru dezafiu tanba servisu ruma la temi iha BoQ no dezeñu laran ami tenke foti desizasaun, maibé dala ruma ami foti desizasaun sala no fó impaktu ba ami-nia pagamentu tanba laiha enjiñeiru ida mak akompaña”, nia lamenta.
Ho nune’e, nia sujere ba autoridade munisipál no Governu katak presiza kontrata fali enjiñeru PDIM hodi akompaña empreza ba prosesu kontrusaun rezidénsia, moru no jardín hodi bele la’o di’ak.
Projetu konstrusaun ba rezidéensia administradór, moru no jardím iha suku Caraubalu, postu Viqueqeu Vila ho kustu obra $470.225,91.
Daudaun ne’e, empreza Peaceful Unip Lda fó kontratu ba traballadór lokál hamutuk na’in 37 hala’o servisu ba rezidénsia ho moru no jardín.
Jornalista: Vitorino Lopes da Costa
Editór : Florencio Miranda Ximenes
