UPM hakarak implementa planu prioridade haat hodi garante dezenvolvimentu institusionál
DILI, 30 janeiru 2024 (TATOLI) – Polísia Unidade Marítima (UPM) iha ona planu prioridade sira ho intensaun atu dezenvolve UPM, liuliu hadi’a jestaun oprasionál, jestaun administrasaun, realiza formasaun ba membru sira no hadi’a infraestrutura iha postu sira.
Komandante UPM, Superintendente Polísia Eugénio Pereira, relata katak ba hadi’a jestaun operasionál UPM nian iha futuru ne’e la’ós haree de’it ba serbisu iha rai-maran, maibé sei reforsa mós atividade iha tasi.
“Ita presiza rekursu ida ne’ebé sufisiente, tanba ne’e presiza reforsa ho kapasitasaun ba membru sira atu oinsá bele sai ema ida profisionál. Sira tenke iha abilidade hodi bele hala’o atividade profisionál iha área marítima nian”, Komandante Eugénio Pereira dehan iha Lecidere.
Ba hadi’a jestaun iha servisu administrasaun nian, UPM ne’ebé durante ne’e falta ekipamentu presiza hetan apoiu, liuliu spead boat nune’e bele fasilita sira-nia serbisu iha tasi-laran.
UPM sei hadi’a mós infraestrutura iha postu foun no tuan sira, tanba postu balun tama ona iha planu no balun estabelese ona maibé seidauk iha kondisaun ne’ebé di’ak hanesan iha postu Batugadé, Suai no Oé-Cusse.
“Iha Oé-Cusse ita seidauk iha postu propriu ida. Durante ne’e ita uza hela edifísiu husi Ministériu Saúde mak oferese”, dehan.
Instituisaun mós sei hadi’a ninia lejizlasaun sira nune’e sai espesífika hodi bele iha orientasaun ida klara atu misaun UPM nian bele tuir duni lala’ok ne’ebé iha no garante dezenvolvimentu ida di’ak ba progresu UPM iha futuru.
Ba implementasaun programa sira ne’e hotu komandu UPM hatama ona iha Orsamentu Jerál Estadu 2024 nian ho montante rihun $627.
“Bainhira atu implementa atividade sira ne’e maka sei submte porposta b komando jerál atu hetan koñesimentu hodi bele ezekuta orsametu sira ne’e tuir duni planu ne’ebé iha ona”, dehan.
Diretór-Ezekutivu Fundasaun Mahein, Nelson Belo, akresenta katak bainhira ko’alia kona-ba kondisaun iha polísia, nia konsidera kuaze unidade hotu ninia kondisaun la di’ak ein termu iha infraestrura nomós jestaun.
“Agora, planu estratéjiku ne’ebé UPM iha ne’e, Fundasaun Mahein konsidera planu ida di’ak nune’e bele responde ba kondisaun ne’ebé sira enfrenta durante ne’e”, realsa.
Tuir dirijente, presiza iha formasaun ida adekuada kona-ba vijilánsia iha tasi, nune’e sira bele korresponde ba planu Polítika Seguransa Nasionál nian. “Hanesan iha Unidade Polísia Marítima bainhira orientasaun atu hala’o vijilánsia iha tasi, sira hatene ona saida maka atu halo, tanba ne’e presiza iha preparasaun ida di’ak atubele responde kondisaun ne’ebé maka komando UPM enfrenta”, sujere.
Daudaun ne’e, UPM iha ona membru hamutuk besik 200, maibé balun la ativu ona tanba sira iha kondisaun saúde ne’ebé la permite atu hala’o knaar, inklui balun sei bá kontinua sira-nian estudu iha rai-li’ur.
Notísia relevante: UPM presiza tan membru atu asegura rekursu naturál iha tasi
Jornalista: Tomé Amado
Editora: Maria Auxiliadora
