ADRA atribui sertifikadu apresiasaun ba grupu kooperativa rai no impresta osan iha Viqueque
VIQUEQUE, 31 janeiru 2024 (TATOLI)– Organizasaun Internasionál Adventist Development and Relief Agency (ADRA), kuarta ne’e, distribui sertifikadu ba grupu kooperativa hitu ne’ebé durante hala’o atividade rai no impresta osan iha munisípiu Viqueque.
Atribuisaun sertifikadu ne’e husi Administradór munisípiu Viqueque, Januáriu Soares “Bolly”, Jestór ADRA, administradór postu Viqueque Vila, Diretór munisipál Viqueque. Ho objetivu atu simboliza graduasaun ba grupu kooperativa sira-ne’ebé durante hala’o atividade rai no impresta osan.
Direjente Organizasaun Internasionál Adventist Development and Relief Agency (ADRA), munisípiu Viqueque, Moizes Pinto, informa establese ona grupu kooperativa rai no impresta osan iha suku 15 no grupu hamutuk 130 no membru na’in-3.322 hosi grupu sira ne’e sira iha kapitál $4.006.500.
“Sertifikadu apresiasaun ba uluk grupu hitu tanba ba oin maka ADRA la existe ona Viqueque, maibé, grupu sira-ne’e bele la’o mesak ho sira-nia kapitál ne’ebé makai ha. Ami distribui sertifikadu ajente suku hodi akompaña ba grupu sira-ne’e hodi habelar atividade rai no impresta iha Viqueque”, dehan Dirijente ne’e hafoin atribui sertifikadu.
Sertifikadu ne’e, ADRA haree grupu hitu ninia atividade la’o di’ak, nune’e grupu sira-ne’ebé maka seidauk hetan ADRA sei distribui etapa tuir mai.
Daudaun ne’e, ADRA mós fasilita hela atividade formasaun kona-bá tekniku rai osan no impresta osan.
Iha biban ne’e, Sekretária Grupu kooperativa Hametin Sira Lari, Odete Juvita Guterres, husu agradese ba ADRA ne’ebé durante fasilita grupu no fó motivasaun ba grupu hodi hala’o atividade rai no impresta osan.
“Ami sente orgullu no husu agradese ba ADRA ne’ebé durante akomapaña ami-nia atividade. Ho sertifikadu ida-ne’e atu motiva ami bele kontinua ami-nia atividade rai no impresta osan”, nia afirma.
Tuir nia, atividade rai no impresta osan atu ajuda tebes membru família sira tanba dala ruma to’o banku prosesu sei kle’ur maka foin impresta osan, maibé atividade ida-ne’e membru sira kada fulan tau osan hamutuk, hafoin impresta fali sente fasil atu asesu.
Grupu ne’e hahú hala’o atividade tinan 2020 no daudaun iha membru ativu na’in-22 ninia fundu kapitál hamutuk $6.590,50
Enkuantu, Administradór munisípiu Viqueque, Januáriu Soares “Bolly”, enkoraja grupu rai no impresta osan atu la’o nafatin hodi hadi’a ekonómia família uma laran.
“Ha’u nafatin ekonraja ba grupu sira atu hakat nafatin ba oin hodi hetan susesu. Liuhusi atividade rai no impresta osan atu grupu sira bele hadi’a moris no sai referénsia ba ema seluk”, nia enkoraja.
Grupu sira ne’ebé mak simu sertifikadu mai husi postu Viqueque-Vila kompostu husi grupu Kmanek, grupu Hanuma, grupu Hametin Sira Lari, grupu Naroman, grupu Kai-kobi Lari, grupu Baharike no grupu Haburas Wesa Oan (HWO) no ajente suku na’in-hitu husi suku Caraubalu no suku Uma-Ki’ik.
Reforsa kooperativa agrikultór
ADRA kompromete reforsa kooperativa agrikultór 12 iha munisípiu Viqueque atu investe ba setór agrikultór tanba bele hasa’e rendimentu másimu hodi suporta ba família.
“ADRA hakarak suporta tékniku ba kooperativa agrikultór sira, nune’e iha koñesementu sira-ne’e halo produsaun agrikultór hodi liga ba merkadu hasa’e rendimentu,” nia afirma.
ADRA servisu hamutuk ho kooperativa agrikultór hodi fasilita sira atu produs produtu sira hanesan ai-lia, kami, prodús mina nuu, ai-lia ut, rebusadu ai-lia no buka merkadu ba kooperativa sira.
ADRA mós fasilita ona fasilidade ba grupu kooperativa agrikultór hamutuk 12 ne’ebé eziste iha munisípiu Viqueque.
“Ba oin ami sei kontinua haforsa kooperativa sira hodi lidera atividade negósiu sira no ami mós sei buka dalan ba kooperativa hodi lori sira-nia produtu asesu ba merkadu”, nia afirma.
Prezidente Kooperativa Hamaifor Bahalara Uain, Mateus Soares, haktuir durante ne’e hala’o atividade produsaun mina nú sona no mina moos hodi faan no kooperativa halo akordu ho loja Silvakoi ne’ebé kada fulan atu fornese ba.
“Ami-nia kooperativa prodús ona mina nú litru 1.000 hodi faan ba merkadu Viqueque no balun ba faan iha Dili. Daudaun ami prepara tan ona litru125 hodi distribui ba loja Silvakoi iha Dili”, nia afirma.
Enkuantu, Kooperativa Hamaifor suku Bahalara Uain, postu Viqueque Vila ho totál membru na’in-95 ne’ebé halai liu produsaun mina nú.
Kooperativa KTM prodús rebusadu
Kooperativa Kréditu Tane Malu (KTM), iha aldeia Naheboruk, suku Uma-Uain Kraik, Viqueque, mós kontinua prodús rebusadu ho matéria produtu lokál ai-lia hodi distribui ba loja Lucky Street.
“Iha tinan ida-ne’e ami kontinua prodús rebusadu ai-lia tanba ami hetan kontratu husi loja Lucky Street lokaliza iha Dili ne’ebé halo akordu ho ami katak kada fulan ami tenke distribui rebusadu ai-lia ba loja Lucky Street ho kuantidade doos 400. Ami mós simu fali materia prima husi loja Lucky Street ba prosesamentu rebusadu ai-lia nian hanesan masi-midar ut no tapioca hodi ami prosesa ba rebusadu”, hatete Prezidente Kooperativa Kréditu Tane Malu, Jelaurina Nunes
Prezidente promete atu garante nia-kualidade ba prosesamentu rebusadu ai-lia tuir estandarizasaun husi loja Lucky Street no konsumidór sira nian hakarak.
“Ami sosa ai-lia fresku ne’e husi ita-nia agrikulór sira, hafoin ami prosesa rasik iha ami-nia fatin kooperativa Naeboru. Iha tinan kotuk ami prodús ona doos 100, kada bunkus ida faan ba $1, maibé kualidade maka ladun di’ak, nune’e ami simu rekomendasaun husi konsumidór sira katak presiza hadi’a ninia kualidade”,nia afirma.
Kona-ba fasilidade nia dehan Kooperativa KTM iha ona fasilidade prosesamentu rebusadu nian maka hanesan tasu listrik, blender, makína press, plastik falun rebusadu no toplex.
Dadaun ne’e, kooperativa KTM membru efetivu hamutuk na’in-38 hodi prodús produtu rebusadu.
Jornalista: Vitorino Lopes da Costa
Editór : Florencio Miranda Ximenes
