DILI, 31 janeiru 2024 (TATOLI) – Komando Polísia Munisípiu Dili kaptura suspeitu ida ho insiál SdC iha Bairro Pité, tanba lori ilegalmente sigarru ho marka Surya pakote 400 atu bá fa’an iha loja balun iha Bidau-Akadiruhun.
Komandante Polísia Munisípiu Dili, Superintende Xefe Polísia Orlando Gomes, informa ekipa servisu sekreta Makikit no Polísia Eskuadra Na’in-Feto kaer suspeitu SdC tanba tula sasán kontra bandu. Suspeitu ne’e agora detein hela iha Eskuadra Na’in-Feto hodi hein prosesu investigasaun no kumpre detensaun durante oras 72 nia laran molok aprezenta ba Ministériu Públiku (MP).
“Ita-nian servisu sekreta Makikit ho Eskuadra Na-in-Feto deteta suspeitu hatama sigaru ilegál atu mai fa’an iha loja Serba Ada Sufian Bidau-Akadiruhun, maibé nia la konsege hatún tanba hetan intervensaun husi polísia. Entaun, nia halai maka polísia sira duni tuir nia bá kaer iha Bairro Pité”, dehan Orlando Gomes hatete iha Caicoli, ohin.
Superintende xefe ne’e haktuir katak suspeitu ho tinan 28, hela iha suku Bairro Pité ne’ebe polísia kaptura ona hamutuk ho evidénsia iha karreta laran. Tuir lei hodi sei entrega ba MP atu foti desizaun ba aktu sira ne’ebé maka nia komete.
Tuir nia, servisu polísia nian maka halo de’it prosesu investigasaun hafoin aprezenta evidénsia ba MP no ba oin ne’e kompeténsia ministériu nian atu foti desizaun hasoru suspeitu refere.
“Sasán sira ita prende ne’e, ita sei submete hotu ba Ministériu Públiku nu’udar evidénsia ida depois mak sei halo intervensaun hodi asegura sasán sira ne’e bazeia ba lei ne’ebé iha”, esplika.
Notísia relevante: Makikit detein tranzasaun sigarru ilegál iha Taibesi
Jornalista: Tomé Amado
Editora: Maria Auxiliadora
