Komandu F-FDTL halo promosaun aban ba militár 210
DILI, 01 fevereiru 2024 (TATOLI) – Xefe Estadu Maiór Jenerál (F-FDTL), Tenente Jenerál, Domingos Raul Falur Rate Laek, hateten Komandu sei promove deviza militár 210 iha ámbitu aniversáriu transformasaun FALINTIL ba F-FDTL ba dala-23 iha 02 fevereiru 2024.
“Hanesan foin daudaun ha’u dehan ona katak sei iha promosaun deviza ba militár sira iha ámbitu aniversáriu ezisténsia transformasaun FALINTIL ba F-FDTL ba dala-23 no lista promosaun ne’e ha’u aprova ona, ita sei halo promosaun deviza ba ita-nia militár sira”, Falur dehan ba TATOLI iha Sentru Instrusaun Komandante Nicolau Lobato, kinta ne’e.
Nia dehan, iha promosaun deviza ne’e feto ida ho naran Tenente Marquita da Cunha nu’udar feto dahuluk ne’ebé promovidu hosi postu Tenente ba Kapitaun no Tenente Rui de Jesus Gomes hosi Postu Tenente ne’ebé promovidu ba Kapitaun.
“Iha promosaun ne’e mak ita promove feto dahuluk hosi Postu Tenente ba Postu Kapitaun no ita-nia Amo Kapelaun F-FDTL Tenente Rui Gomes promove ba postu kapitaun”, Falur haktuir.
Komandu F-FDTL promove militár iha mane 189 no feto 21, mai hosi Unidade FALINTIL, Kuartél Jenerál, Unidade Sentru Instrusaun Komandante Nicolau Lobato, Komponente Navál, Unidade Apoia Servisu, Unidade Polísia Militár no Komponente Aerea Lijeira.
Jornalista: Natalino Costa
Editór : Zezito Silva
