DILI, 01 fevereiru 2024 (TATOLI)–Diretór Saúde munisípiu Lautém (SML), Anastacio da Cruz, aprezenta proposta ba Ministériu Saúde atu aloka pesoál saúde ema na’in-60 hodi koloka ba postu saúde nos entru saúde sira iha Lautém-Lospalos.
“Ita husu ba atu estende sira-nia kontratu, maibé sei iha hela prosesu nia laran kona-ba proposta ne’e. Presiza ema profisionál 60 resin atu koloka ba postu saúde sira ne’ebé mamuk,” Diretór ne’e hateten ba Agência Tatoli liuhosi telefónika, kinta ne’e.
Nia hateten, Ministériu Saúde (MS) mos halo hela rekrutamentu ba iha profisionál saude sira ba munisipiu hotu, tanba ne’e mak sei koloka profisionák saúde sira ba postu saúde sira iha munisípiu ka postu administrative sira iha territóriu nasionál.
“Hein hela tanba Ministériu Saúde mos halo hela rekrutamentu ba profisional saúde sira hodi koloka ba iha sentru saúde no postu saúde sira,” nia hateten.
Tuir nia, seidauk hatene numéru rekrutamentu ba profisional saúde hira mak koloka ba munispiu sira, maibé sei iha kolokasaun ba pesoál saúde sira ba iha postu saúde sira.
Iha Lautém, nia hateten, postu saúde sira-ne’ebé seidauk bele kontinua hala’o atendimente ba populasaun mak hanesan postu saúde Soru, Kakaven, Manueira, Serelau, Tikilite, Laikara no Tirilolo.
Antigu Médika internatu iha postu saúde Soru, Diana da Costa, hateten populasaun iha ne’ebá sei halo hela tratamentu saúde iha postu no sentru saúde seluk, maibé ho distansia ne’ebé dook.
“Iha postu saúde la funsiona, maibé programa Siska mak fulan ida dala ida, entaun profisionál saúde sira dala ruma ba partisipa,” nia hateten ba Agência Tatoli iha Kampung Alor, Dili.
Pasiente sira-ne’ebé halo kontrolu ba postu saúde ne’ebá iha prevalensia moras infesaun vias respiratória aguda (IRA) iha total númeru kuaze 200 ne’ebé halo kontrolu loro-loron ne’ebé maihosi aldeia hitu (7).
Postu saude antes ne’e iha kompostu hosi profisionál saúde sira hanesan médika ida, enfermeira ida, parteira ida no saúde públika ida, maibe termina hela kontratu iha 31 dezembru 2024.
Jornalista : Jesuína Xavier
Editór : Cancio Ximenes
