DILI, 01 fevereiru 2024 (TATOLI) – Xefe Estadu Maiór Jenerál (F-FDTL), Tenente Jenerál Domingos Raul Falur Rate Laek, dehan atu profisionaliza no moderniza Falintil-Forsa Defeza Timor-Leste (F-FDTL) mak presiza halo investimentu iha rekursu umanu, hadia infraestrutura, fasilidade no garante kondisaun moris di’ak militár nian.
“Ha’u sei koalia ho Governu hodi kontinua investe no tau prioridade ba formasaun ba rekursu umanu, fasilidade moderna, dezenvolve infraestrutura no moris di’ak povu nian’’, Falur hateten ba TATOLI iha Sentru Instrusaun Komandante Nicolau Lobato, kinta ne’e.
Falur afirma, Komandu F-FDTL kontinua tau atensaun hodi dezenvolve infraestrutura iha komponente sira hanesan Komponente Terrestre, Navál Aero no kada unidade sira bele profisionaliza servisu forsa iha futuru.
Nia subliña, membru F-FDTL, atualmente, iha 4000-resin. Atu garante sira-nia moris di’ak mak Komandu sei koalia ho Governu atu kontinua ho programa harii bairro foun ba militár sira ne’ebé tuir planu atu harii iha Metinaru inklui iha Kasnafar.
“Ita presiza tau atensaun ba bairro militár tanba atu garante ba bem estar forsa nian, forsa sira presiza hela fatin atu halo servisu ho di’ak. Ha’u atu dehan de’it katak tempu ona ita moderniza no profisionaliza ita-nia forsa”, nia revela.
Iha fatin hanesan, Tenente Jenerál Reformadu Lere Anan Timur, hateten ezisténsia F-FDTL ba dala-23 iha mudansa barak maibé iha komponente Naval iha instuisaun F-FDTL mak la iha mudansa signifikativu.
“Komponente Navál la iha mudansa tanba haree ba Portu Navál Hera ne’ebé mak to’o agora Governu seidauk hadia. Agora Austrália apoiu ita ró Navál rua. Ró ida sei mai iha maiu, maibé ita la iha Portu Navál ne’eb’e di’ak bainhira ró ne’e to’o atu atraka iha ne’ebé tanba Portu Navál aat ona”, nia haktuir.
Lere husu ba Governu atu tau atensaun ba infraestrutura militár tanba kuandu ema ne’e matenek maibé kondisaun fatin la di’ak mak halo ema baruk servisu ho di’ak.
“Ha’u nia tempu ha’u haruka militár 10 ba Filipina, eskola iha área Pilotajen nian, maibé depois sira finaliza tiha sira-nia estudu mai halimar de’it tanba Governu la kria kondisaun ba sira entaun Estadu gasta osan hodi investe ba sira, sorte ha’u nia-maun Lorenço iha aviaun ida fó sira hodi sira naran ka’er halimar”, nia dehan.
“Tanba ne’e iha ha’u nia tempu ha’u aloka orsamentu millaun $92 hodi kria bairru militár, maibé planu ida-ne’e la kontinua, maibé Ministru Defeza ne’ebé troka malu ne’e la’os ema sivil sira maibé hosi militár. Sira hatene problema no difikuldade ne’ebé militár hasoru, ha’u espera sira sei fó atensaun ba ida-ne’e”, nia afirma.
Jornalista: Natalino Costa
Editór : Zezito Silva
