iklan

NASIONÁL, EKONOMIA, HEADLINE

Governu deskarga foos importasaun tonelada 2.000 hosi Kambódia

Governu deskarga foos importasaun tonelada 2.000 hosi Kambódia

Ministru Komérsiu no Indústria, Filipus Nino Pereira ho ekipa lansa foos importadu ho marka MCAE 25 KG, husi nasaun Kambódia, iha Portu Tibar, kinta (01/02). Imajen Tatoli/Francisco Sony

LIQUIÇÁ, 01 fevereiru 2024 (TATOLI)–Governu liuhosi Ministériu Koordenadór Asuntu Ekonómiku (MKAE) hamutuk ho Ministériu Komérsiu no Indústria (MKI), kinta ne’e, halo deskargamentu foos importasaun tonelada 2.000 (korverte ba foos kilograma 25 hetan saka 88.480) hosi nasaun Kambódia, iha Portu Tibar.

Antes ne’e, Timor-Leste no Kambódia asina akordu iha loron 20 outubru 2022 hodi halo akizisaun foos no iha tempu hanesan inisiativa ne’e nu’udar kompromisu Governu ne’ebé hatuur iha dekretu-lei 76/2023 kona-ba intervensaun temporária ba estabilizasaun folin foos iha merkadu, ne’ebé sei rai iha armazein Sentru Lojístiku Nasionál (CLN, sigla portugés).

“Akordu ne’ebé asina ona ho nasaun Kambódia atu importa foos hamutuk tonelada 4.000, ne’ebé hosi númeru ne’e sei importa pur faze, entaun agora tonelada 2.000 mak to’o uluk no seluk iha faze tuir mai,” Reprezentante Ministru Koordenadór Asuntu Ekonómiku, Anibal Carvalho Martins, hateten iha Portu Tibar.

Notísia relevante : MKAE garante stock foos iha armazen sufisiente ba konsumu nasionál

Foos ne’ebé iha atu asegura katak ema sei hetan asesu ba ai-han sufisiente no estável to’o marsu 2024.

“Foos ne’ebé ita halo akizasaun to’o ona atu rezerva iha armazein CLN hodi atende nesesidade urjente ka ba seguransa ai-han nasionál hanesan normaliza presu foos iha merkadu nasionál, maibé buat hotu sei hein desizaun hosi Governu atu fa’an ka distribui,” nia akresenta.

Iha fatin hanesan, Ministru Komérsiu Indústria, Filipus Nino Pereira, relata, Governu sosa foos tonelada 4.000 ho kustu millaun $3.

“Foos ne’ebé ita sosa ne’e hosi Governu Kambódia liuhosi kompañia Green Trade Campany (GTC), ne’ebé hatudu inísiu relasaun merkadu Timor-Leste ho Kambódia,” Ministru tenik.

Bainhira atu utiliza foos ne’e halo intervensaun ba merkadu sei haree hotu nia mekanizmu tanba daudaun empreza rua sei fa’an foos subsídiu hosi Governu.

Nune’e mós, Prezidente CLN, Gervásio Cardoso, informa, foos ne’e sei rai iha armazein Bebora.

“Foos produtu lokál ne’ebé daudaun ne’e ita tau iha armazein nasionál hamutuk tonelada 1.500, ne’ebé garante hodi atende ba situasaun emerjénsia sira,” nia tenik.

Atividade deskargamentu ne’e partisipa hosi MKAE, MKI, Komisaun Antí-Korrupsaun no entidade relevante seluk.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!