DILI, 01 fevereiru 2024 (TATOLI)—Governu Koreia Súl, daudaun ne’e hahú loke filafali oportunidade serbisu iha área agrikultura ba timor-oan, ne’ebé antes ne’e suspende.
Kestaun ne’e fó sai bainhira Diretór Nasionál Empregu Estranjeiru, João Correira Pereira, halo enkontru ho Diretór Human Resource Development (HRD) Koreia, Kim Min Hee, iha salaun HRD Koreia, Becora, kuarta (31/01).
“Iha enkontru ne’e, parte rua ko’alia kona-ba preparasaun ba rejistu estudante foun ezame Employment Permit System – Test in Proficiency in Korean (EPS-TOPIC) iha tinan 2024. Tuir planu rejistu ba ezame foun ne’e sei akontese iha marsu tinan ne’e, ne’ebé sei aumenta tan área agrikultura,” Kim Min Hee, hateten liuhosi nota ne’ebé Agência Tatoli asesu, kinta ne’e.
Notísia relevante : Traballadór timor-oan 867 iha Koreia Súl sei hetan renovasaun pasaporte
Biban ne’e, Diretór Nasionál Empregu Estranjeiru, João Correia Pereira, agradese ba Governu Koreia Súl liuhosi HRD Koreia iha Timor-Leste, ne’ebé iha tinan ida-ne’e bele loke filafali oportunidade ba joven timor-oan sira atubele kompete.
Governu Korea Súl iha tinan 2009 to’o 2013 simu traballadór timor-oan hosi Timor-Leste iha área tolu hanesan área fábrika, peska, no agrikultura, maibé iha tinan 2014 to’o 2023 suspende simu traballadór timor-oan serbisu iha área agrikultura.
“Maibé iha tinan ida-ne’e Governu Koreia Súl loke filafali oportunidade ba joven timor-oan sira,” nia akresenta.
Tuir informasaun hosi Diresaun Nasionál Empregu Estranjeiru (DNEE) Sekretaria Estadu Formasaun Profisionál no Empregu (SEFOPE) antes ne’e halo prosesu rekrutamentu traballadór timor-oan bá Koreia Súl liuhosi EPS-TOPIK iha área agrikultura hahú hosi 2010 to’o 2013 hamutuk 126 kompostu hosi mane 53 feto 73.
Jornalista : Arminda Fonseca
Editora : Julia Chatarina
