iklan

DILI, POLÍTIKA

PN husu MOP solusiona problema ahí mate-lakan

PN husu MOP solusiona problema ahí mate-lakan

Tékniku EDTL, E.P halo hela manutensaun liña eletrisidade iha Estrada-ibun Praia dos Coqueiros, Dili, kuarta (14/06/2023). Imajen Tatoli/Francisco Sony

DILI, 01 fevereiru 2024 (TATOLI)—Parlamentu Nasionál (PN) liuhosi Prezidente Komisaun E trata asuntu Infraestrutura, Deputadu Marcos Xavier, husu Ministériu Obra Públika (MOP) atu solusiona problema ahí mate-lakan.

Nia hateten, Timor-Leste ne’e bainhira udan mai no rai lakan ho anin boot mosu ne’e, ahí sempre mate ne’e lahatene nia impaktu mai hosi ne’ebé maibé observasaun komisaun nian nota katak, fiu ne’ebé agora daudaun iha Dili laran ne’e tempu Indonézia nian to’o agora.

Entaun, nia hateten, ninia impaktu ida mak ne’e no tuir loloos bele troka ona, maibé agora depende ba Governu haree se iha orsamentu.

“Ida fali ita iha ai-hun boot de’it laiha manutensaun ba iha ai sira-ne’e, nune’e evita labele iha sirkuitu ba fiu. Entaun, liuliu EDTL tenke haree halo manutensaun ba ai sira-ne’e ou tesi aparu tiha, tanba se ai ne’e monu kona fiu sempre ahí mate,” nia hateten ba jornalista sira iha uma fukun PN, kinta ne’e.

Membru órgaun lejislativa ne’e fiar katak IX Governu Konstitusionál sei esforsu makaas oinsá atu hadi’a ba oin, atu labele akontese tan problema ahí mate.

Antes ne’e, Ministru Obras Públika (MOP), Samuel Marçal, hateten iha proposta Orsamentu Jerál Estadu 2024 ne’e ministériu tau ona prioridade atu halo dijitalizasaun ba sistema manuál hodi solusiona probelma ahí mate-lakan.

“Dalaruma husu tanbasá mak transferénsia boot loos ba eletrisidade no balun kestiona nusa mak ahí mate beibeik. Ha’u atu informa de’it iha uma fukun ida-ne’e katak ita iha tinan oin, tanba ita iha problema durante ne’e eletrisidade sei la’o hela ho sistema manuál. Ha’u haree no akompaña tékniku sira dalaruma la’o ba tuir ai-riin ba leno tutuir fiu kanek ruma iha ne’ebé. Tanba ne’e mak ita tau osan ba ne’e no ba tinan oin hahú prosesu aprovizionamentu, nune’e ita komesa ona ho buat ida dijitalizasaun,” Ministru hateten.

OJE 2024 ba Ministériu Obra Públika (MOP) prevee $224.279.372 hodi aloka ba saláriu vensimentu $9.187.551, bens no serbisu $21.802.827, transferénsia públika $155.000.000, kapitál menór $198.400 no kapitál dezenvolvimentu $38.090.594.

Hosi orsamentu ne’e aloka ba programa estrada no ponte hamutuk $51.515.032, programa dezevolvimentu rurál no urbanu $2.804.340, programa funsionamentu no dezenvolvimentu instituisionál $13.611.520, programa agua no saneamentu $6.588.680, programa eletrisidade $149.118.800, programa laboratóriu no infraestrutura $641.000.

Tuir dokumentu livru proposta-lei OJE 2024 planu asaun anuál ba MOP tau prioridade ba programa neen (6) mak hanesan programa estrada no ponte ho ninia sub-programa infraestrutura estrada, ponte no kontrolu cheias ho atividade 12, sub-programa investe iha planeamentu, atualizasaun, manutensaun no regulamentasaun rede rodaviáriu ho atividade rua.

Programa dezenvolvimentu rurál no urbanu ho ninia sub-programa estabelese no aplika kontrola konstrusaun ho atividade tolu, sub-programa dezenvolve polítika planeamentu urbanu ho atividade tolu, sub-programa melora abitasaun nasionál ho atividade haat (4).

Progama funsionamentu no dezenvolvimentu instituisionál ho sub-programa rua (4) no nia atividade hamutuk 15.

Programa água no saneamentu ho nia sub-progama dezenvolvimentu no manutensaun sistema abastesimentu bee iha área rurál no urbanu ho atividade mak rua (2), sub-programa jestaun saneamentu ho atividade rua, sub-programa regulasaun jestaun ba rekursu hídriku no abastesimentu bee iha área rurál no urbanu ho nia atividade neen (6).

Programa eletrisidade ho nia sub-programa apoiu destinadu peskiza no regulasaun atividade elétrika ho atividade tolu, sub-programa enérjia elétrika oras 24 ho atividade ida (1).

Programa laboratóriu infraestrutura ho sub-programa dezenvolve apoiu norma téknika no teste ba konstrusaun no enjenária sívil ho atividade haat, sub-programa kontrola kualidade konstrusaun sívil no obra públika.

Jornalista : Nelson de Sousa

Editór         : Cancio Ximenes

 

iklan
iklan

Leave a Reply

iklan
error: Content is protected !!