DILI, 02 fevereiru 2024 (TATOLI) – Fundadór Fundasaun Klibur Alezadu Timor Lorosa’e (KATILOSA), Laurentino Guterres, informa, prioriza programa fó edukasaun no saúde atu dezenvolve no fó oportunidade ba ema ho difisiente sira.
“Ami iha programa hamutuk haat, ida mak reabilitasaun baze ba komunidade ema ho difisiente sira, loke vocational training, tratamentu saúde liuhosi physiotherapy ba maluk difisiente no edukasaun inkluzivu ba difisiente,” hatete Laurentino ba Agência TATOLI iha Faról Dili, sesta ne’e.
Programa reabilitasaun baze ba komunidade atu hakbesik aan liu ba komunidade no kada loron sempre ba vizita komunidade hirak ne’ebé kondisaun saúde ho difisiensia no hosi programa ne’e KATILOSA iha funsionariu na’in rua ne’ebé kada loron vizita ema ho difisiente iha uma-kain idaidak liuliu iha parte Leste.
“Bainhira sira vizita, komunidade iha atividade barak mak sira halo hanesan fó hanoin ba maluk difisiente sira, karik maluk difisiente balun presiza tratamentu physiotherapy entaun sira ajuda, halo mós edukasaun ba familia sira oinsá mak tau matan no kuidadu ba ema ho difisiente sira,” nia hatete.
Enkuantu, iha programa vokasionál training, nia dehan konsege haruka ona membru na’in tolu ba tuir formasaun iha Indonézia kona-bá artezenatu nian to’o ohin loron konsege implementa iha Fundasaun.
“Ida ne’e mak ami nia membru sira konsege halo ona produsaun ba estatua sira, halo ka prodús artezanatu ba estatua sira hanesan iha Motaél ita ba misa haree krus boot ida halo ho ai-teka ne’e hosi KATILOSA nian, maibé Prezidente Repúblika José Ramos Horta mós konsege ba ona ami nia fatin hodi sosa ami nia produtu,” nia relata.
Kona-ba programa edukasaun inkluziva, nia afirma atu fasilita labarik sira ho kondisaun difisiensia atu asesu ba eskola tanba iha Timor-Leste 90% ema ho difisiente la asesu ba eskola.
“Ami nia programa ida ne’e oinsa atu fasilita ita nia alin ki’ik-oan sira ne’ebé moris ho difisiente atu bele asesu ba eskola, tanba ita haree iha Timor-Leste kuaze 90% ema ho difisiente la asesu ba eskola. Entaun iha ami nia programa ne’e ami nia funsionáriu sira tama-sai uma hodi hanorin labarik sira ne’ebé difisiente hosi uma ba uma, maske difisil maibé ami voluntáriu la’o to’o tinan kotuk, Nune’e ami konsege halibur labarik difisiente hamutuk 62 mai eskola iha ami nia fatin,” nia akresenta.
Hosi programa edukasaun inkluzivu hetan apoia másimu fundu hosi fundasaun Igreja nian ida hosi Austrália.
“Ami iha mestre na’in-rua mak hanorin ba labarik difisiente hirak ne’e, foin lalais ami rekruta tan mestre na’in ida agora ita iha ona mestre na’in tolu mak hanorin iha KATILOSA ba labarik difisiente sira oinsa bele le’e, hakerek, kanta, toka no seluk tan,” nia afirma.
Alende ne’e, KATOLISA mós tenta hela oinsa atu loke mós eskola kona-ba lian jestuál ba ema ho difisiente matan no la hatene ko’alia.
KATILOSA harii iha tinan 2000 ho misaun importante mak tau matan ba ema ho difisiente hodi muda sira nia moris di’ak liu ba oin, maske sira kondisaun ho kondisaun defisiensia.
Dadaun ne’e, KATILOSA iha funsionáriu na’in-14 no labarik ho kondisaun difisiente 60-resin mak halibur hamutuk iha edifísiu Baucau.
“Ami hetan apoiu hosi Austrália, maibé osan la barak, barak liu ami servisu ho voluntáriu,” nia konklui.
Notísia relevante: Maske la folin iha espozisaun, la hamate ezisténsia grupu Artezenatu KATILOSA
Jornalista: Hortencio Sanchez
Editór : Florencio Miranda Ximenes
