DILI, 02 fevereiru 2024 (TATOLI)—Membru Parlamentu Nasionál (PN) Liuhosi Deputadu Congresso Nacional da Reconstrução Timorense (CNRT), Marcos Xavier, husu Ministériu Obra (MOP) ho instituisaun tutela Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P) atu pro-ativu halo intervensaun agora iha tempu udan bainhira akontese rai monu, estrada no ponte hetan estragu iha territóriu laran.
Deputadu CNRT, Marcos Xavier, sujere ba ministériu relevante atu lalika hein udan monu rai maibé molok udan monu rai tenke kria ona ekipa hodi tun hamoos valeta sira liuliu iha kapitál Dili hodi prevene inundasaun.
“Foin daudaun akontese inundasaun iha Dili ekipa boot hosi Obra Públika ne’ebé lideradu hosi Ministru tun diretamente hamoos rai monu IGEADEmós tun iha fati-fatin. Hanoin IGEADE, I.P nia ekipamentu mós mesak tuan hotu ona sira esforsu aan halo normaliza. Komisaun E rekomenda ba MOP tenke kria ona ekipa ida tun hamos valeta sira iha Dili laran, para udan boot mai labele inundasaun iha Dili,” Prezidente Komisaun E trata asuntu Infraestrutura iha PN ne’e hateten iha uma fukun PN.
Nia mós husu populasaun sira hela iha kapitál Dili tenke iha konsiénsia atu labele harii uma valeta leten no soe foer arbiru, tanba udan mai bee halai fatin laiha entaun hamosu inundasaun.
Deputada, Cedelísia dos Santos, fó hanoin ba MOP no IGEADE, I.P atu ativu tau atensaun iha tempu udan liuliu iha munisípiu sira hodi haree ba mota, ponte no estrada ne’ebé estragu fó ameasa ba movimentu komunidade nain, nune’e presiza iha intervensaun lalais hodi fasilita transportasaun komunidade.
Nia mós preokupa iha Dili ho problema lixu ne’ebé sei fó impaktu ba inudasaun, tanba ne’e nafatin husu komunidade atu iha konsiénsia labele soe foer arbiru. Membru Parlamentu Nasionál ne’e husu populasaun hotu atu kuidadu an iha tempu udan.
Deputada, Ermenegilda da Costa Laurentina, hakarak fó hanoin relasiona ho agora komesa tempu udan mak MOP liuhosi instituisaun IGEADE, I.P atu ativu utiliza ekipamentu pezadu ne’ebé iha hodi normaliza fatin estragu sira iha área remota.
“Hanoin tempu udan papél Obra Públika ho instituisaun tutela sira mak tenke pro-ativu iha terrenu liuliu haree ba iha fatin risku sira la’ós iha Dili laran de’it maibé iha territóriu laran tomak,” Eis Prezidente IGEADE, I.P ne’e hateten.
Nia mós fó hanoin ba komunidade hela iha fatin risku hanesan mota ninin, foho lolon atu kuidadu aan bianhira udan ho intensidade boot.
Jornalista : Nelson de Sousa
Editór : Cancio Ximenes
