DILI, 02 fevereiru 2024 (TATOLI)–Prezidente Ekipa Konjunta hosi Ministériu Saúde, Vidal de Jesus, hateten iha semana ida-ne’e profisionál saúde hamutuk 229 tama ona no servisu iha Hospital Nasionál Guido Valadares (HNGV, sigla portuges) tanba urjente hodi atende pasiente sira, maske sira seidauk asina kontratu.
“Iha asuntu administrative (asina kontratu) ne’ebé presiza rezolve, maibé HNGV fó proriodade ba atendimente, tamba iha relasiona ho ema nia vida. Ema-nia vida lahein prosesu administrativu halo tiha lai mak hodi salva. Halo tiha atendimentu ukuk lai, tanba ne’e relasiona ho ema-nia vida,” Prezidente Ekipa Konjunta hosi Ministériu Saúde ne’e hateten liuhosi konferensia imprensa, iha Institutu Nasionál Farmásia no Produtu Medikamentu (INFPM), iha Kampung Alor, sesta ne’e.
Nia garante katak ida-ne’e hetan aprovasaun hosi Ministra Saúde, Elia Amaral, signifika iha solusaun ba iha prosesu administrativu ba profisionál saúde sira-ne’e.
Kona-ba profisonál saúde sira-ne’e sufisiente ka lae, nia hatán, HNGV aprezenta pedidu ema 300 maibé juri aprova de’it ema 229, maibé ida-ne’e mos bele hakmaan ona servisu no ba atendimentu ba apsiente sira HNGV.
Diretora Ezekutiva Hospitál Nasionál Guido Valadares (HNGV), Cecilia Barros Mendonça, hateten konsellu HNGV prepara hela kontratu hodi asina iha semana ida-ne’e nia laran.
“Agora daudaun sira halo servisu dezde ekipa juri entrega ba ami. Loron primeiru formasaun no segundu koloka sira ba kada unidade. Semana ida-ne’e, sira asina kontratu ba fulan neen nia laran. Ita sei halo avaliasaun rigorozu,” nia dehan.
Funsionáriu hirak ne’e kompostu hosi médiku jeral 10, enfermeiru 110, parteira 20, téknika analisis laboratóriu 10, motorista 10, tékniku radiolojia hitu (7), tékniku farmásiahitu (7), saúde públika lima (5), enfermeiru anestesia haat (4), oftamolojia haat (4), enfarmajen dentaria tolu (3), tékniku nutrisaun tolu (3), motorist haat (4), pesoál limpeza 20, sekretariarua (2), enjeñaria ida (1), koordenadór tékniku ida (1), asesór juridiku ida (1), enjeñeiru arkitetu ida (1) no enjeñeiru sivil ida (1).
Jornalista : Jesuína Xavier
Editór : Cancio Ximenes
