iklan

NASIONÁL, EKONOMIA, HEADLINE

Programa pilotu akompañamentu família válidu de’it ba traballadór PALM

Programa pilotu akompañamentu família válidu de’it ba traballadór PALM

Traballadór timoroan sira tuir atividade serimónia despedida no asina deklarasaun, molok dezloka ba Austrália, iha salaun Timor Lodge, sesta (22/09/2023). Imajen Tatoli/Egas Cristóvão

DILI, 02 fevereiru 2024 (TATOLI)—Sekretaria Estadu Formasaun Profisionál no Empregu (SEFOPE), sesta ne’e, lansa programa pilotu akompañamentu família.

Diretór Jerál Formasaun Profisionál no Empregu, Carlito Rosário Cabral , informa, programa ne’e nu’udar programa pilotu ida hosi eskema Pacific Australia Labour Mobility (PALM) liuhosi akordu entre Governu Timor-Leste no Australia.

“Programa ne’e sei oferese oportunidade ba traballadór sira eskema PALM ho kontratu tempu naruk, hamutuk na’in-200 atu lori sira-nia família bá Austrália. Maibé vaga 200 ne’e la’ós ba timor-oan sira de’it, maibé ba nasaun 10 ne’ebé benefisia programa ne’e,” Carlito Rosário Cabral, relata liuhosi konferénsia imprensa, iha salaun SEFOPE, Caicoli.

Programa pilotu akompañamentu família nia objetivu maka atu hamenus impaktu sosiál negativu sira kona-ba separasaun família.

Notísia relevante : Hahú abríl 2022, Timor-Leste aplika PALM Scheme

Governu Austrália iha kompromosu atu suporta traballadór timor-oan sira hosi eskema PALM ho kontratu tempu naruk atu lori sira-nia família, maibé tenke ho empregadór ka empreza sira-nia konkordánsia.

“Ida-ne’e tanba empregadór ka empreza sira maka sei iha papel importante atu apoia traballadór no família sira-nia aplikasaun, hahú hosi inísiu prosesu aplikasaun to’o ramata,” nia akresenta.

Enkuantu, sesaun informasaun kona-ba programa pilotu ne’e disemina ona ba família sira ne’ebé elijível iha dezembru 2023, ne’ebé momentu ne’ebá DNEE divulga ona informasaun klaru kona-ba prosesu atu partisipa iha programa.

Traballadór ho sira-nia família imediatu sei halo desizaun hamutuk no ko’alia ho empreza karik iha interese.

Kritéria atu partisipa iha programa pilotu ne’e:

  1. Haree filafali kritéria hosi programa akompañamentu família iha PALM nia website;
  2. Traballadór tenke ko’alia ho ninia empregadór ka empreza. Traballadór presiza empregadór ka empreza nia apoia atu aplika, nomós iha kriteria ne’ebé empregadór/kompaña maka tenke prienxe. Ezemplu, labour hire companies ka ajénsia sira la elijível. Bainhira traballadór serbisu ba labour hire company entaun nia labele ka la elijível atu aplika;
  3. Se empregadór ka empreza elijível, no konkorda atu suporta traballadór nia aplikasaun, traballadór tenke husu empregadór atu imprimi formuláriu aplikasaun liuhosi eskema PALM nia website hodi fó ba traballadór atu prienxe;
  4. Traballadór tenke prienxe formuláriu refere ho kompletu, asegura katak pergunta iha formuláriu ne’e hatan ho kompletu. Traballadór sei entrega formuláriu ne’e ba empregadór ka empreza;
  5. Empregadór sei reprezenta traballadór hodi aplika ba programa akompañamentu família.

Liña tempu ba aplikasaun:

  1. Aplikasaun ba programa ne’e hahú loke ona iha loron 26 janeiru to’o 23 fevereiru 2024;
  2. Selesaun ba aplikasaun sei halo iha fin fulan-fevereiru to’o marsu klaran;
  3. Notifikasaun kona-ba rezultadu selesaun aplikasaun sei halo kedas iha fulan-marsu klaran;
  4. Empregadór no família hahú prosesa aplika família sira-nia viza iha fin marsu;
  5. Se família sira hetan viza duni, sira tenke partisipa iha sesaun informasaun kona-ba preparasaun nomós lala’ok moris iha Austrália iha inisíu fulan-maiu;
  6. Família sira ne’ebé selesionadu sei viajen bá Austrália iha fulan-maiu klaran.

“Fó hanoin fali katak, empregadór mak sei iha papel importante atu aplika em nome de traballadór no família ba programa refere. DNEE ninia papel maka atu fasilita informasaun sira kona-ba programa refere ba família sira iha Timor no koordena serbisu entre PALM, empregadór no família,” nia tenik.

Totál traballadór ne’ebé serbisu iha Austrália hamutuk 5.000, enkuantu traballadór ne’ebé serbisu tinan naruk ka tinan-tolu ba leten 1.000.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!