iklan

COVALIMA

Aldeia tolu iha suku Taroman la asesu eletrisidade tanba transformadór elétriku aat

Aldeia tolu iha suku Taroman la asesu eletrisidade tanba transformadór elétriku aat

Foto google

COVALIMA, 05 fevereiru 2024 (TATOLI) – Dezde 01 janeiru, populasaun iha aldeia Makous, Fatuloro no Holba, iha suku Taroman, la asesu ba enerjia elétrika tanba transformadór elétriku aat.

“Ahi mate komesa iha loron 01  fulan-janeiru 2024  to’o ohin loron seidauk lakan , nune’e iha tempu kalan ami tenke uza fali lampu tradisionál hodi hetan naroman”, eis-xefe aldeia Makous,  Francisco Leite, dehan ohin.

Francisco Leite hatutan maske empreza Holpit instala hotu ona fiu eletrisidade sira iha komunidade nia uma ida-ida, maibé ahi la lakan. “Instala ahi halo saida, di’ak liu lalika halo instalasaun tanba komunidade hakarak instala ona ahi  ne’e tenke lakan oras 24, maibé ida ne’e instala hotu  ahi lakan hanesan mehi de’it”, nia lamenta.

Xefe Aldeia Fatuloro, Fernando Noronha, salienta populasaun preokupa tanba empreza instala ona eletrisidade, maibé ahi la lakan halo komunidade nafatin uza lampu tradisionál.

Tanba ne’e, nia dehan komunidade hein nafatin ekipa téknika Eeletrisidade Timor-Leste (EDTL) atu hadi;a nune’e ahi bele lakan ho normál.

Populasaun iha suku Taroman postu administrativu Fatululik hamutuk 2.185 ho nia xefe familia 567.

Xefe Unidade EDTL, E.P, Anorito Mendonça, klarifika ahi-mate durante fulan-ida iha postu aldeia Holba, Makous, Fatuloro tanba empreza seidauk entrega projetu instalasaun ba EDTL tanba sei iha faze konstrusaun.

“Ha’u sei bá Dili, hafoin fila mak ha’u tun direta bá tereñu hodi haree problema refere”, dehan.

Nia salienta katak, durante ne’e, tékniku EDTL Covalima simu keixa husi postu administrativu de’it, tanba ne’e nia parte sei halo identifikasaun didi’ak problema ne’e.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!