iklan

EDUKASAUN

Governu tenke uza ortográfia padronizada Tetun INL iha dokumentu Estadu

Governu tenke uza ortográfia padronizada Tetun INL iha dokumentu Estadu

Diretora Institutu Nasionál Linguístiku (INL), Rosa da Costa Tilman. Imajen/Espesiál.

DILI, 05 janeiru 2024 (TATOLI)—Diretora Institutu Nasionál Linguístiku (INL), Rosa da Costa Tilman, hateten Estadu no Governu tenke uza loloos ona ortográfia padronizada Tetun Institutu Nasionál Linguistíka (INL) iha dokumentu Estadu nian iha sida-idak nia kna’ar fatin.

“Ha’u husu boot mak órgaun Estadu nian sira mak uza uluk tanba sira mak tau regra ne’e no sira mak halo. Estadu np Governu tenke aplika loloos ona regra ida-ne’e ba dokumentu Estadu nian no tenke padraun Tetun INL iha atividade hakerek karta formál servisu nian loro-loron,” Diretora ne’e hateten ba Agência Tatoli iha nia kna’ar fatin, Liceu, segunda ne’e.

Institutu Nasionál Linguístiku (INL) ne’e Estadu mak hatuur bazea ba dekretu-lei no ortográfia sira Estadu mak hatuur, entaun Estadu nia-emar mak hakerek di’ak uluk ortográfia ne’e, nune’e INL bele deznvolve.

“Ita mak tenke hakerek di’ak uluk, nune’e ema hotu halo tuir. Se ita mak la tau interrese, entaun ema hotu la tau interrese. Tanba, nia halo tiha hotu, nia la interrse, oinsá mak ema bele uza ortográfia padronizada tetun INL ne’e,” nia rekomenda.

Tuir nia, daudaun ne’e dokumentu Governu nian hahú ona hakerek ho tetún ortografia padronizada INL nian maibé la konsisten iha hakerek.

Husu kona-ba difrerensa entre tetún INL, DIT ho Igreja, nia hatán, kestaun ida-ne’e mak ema barak levanta, tanba ema konfundi atu uza tetun ida-ne’ebé loos, atu uza tetún igreja nian ka tetun INL nianj ka tetun DIT nian.

“Ba ha’u-nia resposta simples de’it. Maibé, loloos tenke uza tetun INL tanba INL ne’e harii bazea dekretu-lei númeru 1/2004, 14 abríl, no legaliza nu’udar ofisiál no sai mahein guardiaun ba língua tetun ka língua nasionál sira seluk. Karik obedese ba lei haruka ne’e, klaru tenke tuir dekretu-lei, mak ita teneke adota ortografia padronizada Tetun INL ne’e,” nia esplika.

Tuir nia, ministériu sira-ne’ebé daudaun ne’e promove no utiliza ona ortográfia padronizada Tetun INL ne’e mak Ministériu Edukasaun, Komisaun Funsaun Públika, tanba teste ba méritu ne’e sempre uza tetun INL nomos Ministériu Jurisa no SERVE mós hakerek dokumentu ofisiál ne’e hakerek ho ortogáfia pafronizada tetun INL.

Atu promove ortográfia padronizada liuhosi ministériu edukasaun no ba profesór sira iha eskola, nia dehan, klaru atu promove ne’e INL nian servisu maibé tenke proposta hosi ministériu mak INL bele fo fomasaun.

“Ezemplu, Ministériu Planu no Ordenamentu, sira haruka tiha karta mai atu fó formasaun maibé to’o agora sira seidauk fó oráriu fiksu,” nia dehan.

Obstákulu bainhira fó formasaun ne’e, daudaun ne’e hala’o iha Dili de’it tanba munisípiu iha ona esperiénsia sira tuir formasaun to’o hotu maibé iha Dili ne’e la hotu, tanba membru INL fó formasaun ba sira iha semana ida, depois sira mai tuir liu-liu de’it.

Durante ne’e, INL fó formasaun tetun ba estudante, profesór no funsionáriu sira inklui ba estudante finalista sira hodi hakerek artigu.

“Ami presiza orsamentu hodi realiza formasaun tanba ba prodús seritikadu, prodús matéria didátiku sira ba profesór. Ami hakarak ema hotu-hotu hatene kona-ba regra oinsá hakerek tetun ne’ebé di’ak, maibé ema ne’e rasik laiha vontade entaun oinsá mak ita bele dezenvolve tetún ba ema,” nia dehan.

Tanba, nia dehan, orsamentu laiha mak formasaun ne’ebé INL fó ne’e loron tolu-tolu ne’e la sufisiente, tanba ne’e formasaun INL halo fazeadamente katak tinan ida-ida tenke perkore munisípiu hotu-hotu.

Planu no atividade INL nian ba tinan ne’e, nia dehan, iha abríl mak atu halo programa “semana lian tetún” signifika atividade ne’e hala’o iha semana ida.

Iha atividade ne’e sei iha feira livru, semináriu no iha semináriu nia-laran ne’e mai sei fahe informasaun ba UNTL, maibé ba sira-ne’ebé hakerek artigu ho tetun.

Programa rutina ba INL mak halo diseminasaun ka formasaun ba profesór sira iha munisípiu, ida-ne’e hanesan atividade, dalaruma ba tinan ida-ne’e parese INL sei la realiza tanba UNTL nia orsamentu iha redusaun, katak unidade hotu-hotu iha UNTL kona hotu.

“Ita hein fali fulan neen tuir mai, parese sei halo. Maibé, ita halo nafatin tanba ida-ne’e hanesan atividade rutina. Maibé atividade primiera-vés ami atu halo mak, iha fulan abríl kona-ba atividade ‘semana lian tetún’,” nia hateten.

Antes ne’e, Diretór Jerál Institutu Nasionál Linguístika (INL) Sesante, Benjamin de Araújo e Corte-Real, hateten Institutu Nasionál Linguístika hetan fiar hosi dekretu Governu nian Nú. 1/2004, 14 Abril, atu bele dezenvolve lia-tetun tanba iha joven barak ne’ebé iha esperiénsia hosi Nasaun balun bele dezenvolve lia-tetun atu iha regra ne’ebé di’ak ba futuru.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!