Kuarta, pose bá estrutura foun Autoridade Munisipál Bobonaro

BOBONARO, 05 fevreiru 2024 (TATOLI) – Vise-Ministru Administrasaun Estatál (MAE), Jacinto Rigoberto, iha loron-kuarta (07/02) ne’e sei fó pose ba estrutura foun Autoridade Munisipál Bobonaro komposta hosi Sekretáriu Munisipál, Diretór Servisu Munisipál no Administradór Postu Administrativu sira. Serimónia ne’e sei realiza iha Jináziu Maliana.

Prezidente Komisaun Organizadora ba Preparasaun Serimónia Pose, Duarte dos Santos, hateten preparasaun ba evantu ne’e hahú kedas iha sesta semana kotuk.

“Ita-nia serimónia tomada de pose ne’e loloos hala’o iha tersa, maibé kestaun tempu ita adia ba kuarta-feira, ne’ebé iha sesta liubá ita halo limpeza jerál, ne’ebé envolve funsionáriu hotu-hotu, orsida ita sei halo gladi ba emposadu sira tenke forma halo nusá, tama halo nusá, depois fiksu mak foin define aban,” Nia informa ba jornalista sira iha Jináziu Maliana, segunda ne’e.

Duarte subliña, daudaun ne’e Komisaun Organizadora fó-sai ona konvite ba Bobonaro oan ne’ebé túr iha estrutura IX Governu, governu anteriór no membru deputadu atuál no  eis deputadu sira.

Nia hatutan, serimónia ne’e sei partisipa hosi família emposadu, veteranu, autoridade lokál no la taka dalan mós ba komunidade sira-ne’ebé hakarak partisipa.

“Sira bele haree ita-nia estrutura munisípiu foun mak ida-ne’e, ita mós konvida Bobonaro oan ne’ebé hetan komfinasa iha nasionál atu marka prezensa ne’e bele hanesan mós motivasaun ba ita-nia estrutura foun depois bele esforsu liután servisu ba iha futuru,” nia katak.

Nomeasaun Sekretáriu Munisipál, Diretór Servisu Munisipál no Administratór Postu Administrativu sira iha Munisipál Bobnaro, bazea bá despaxu númeru 12/M-MAE/I/2024 no Dekretu-Lei númeru 3/2016, 16 marsu, ho redasaun aprovadu hosi Dekretu-Lei númeru 84/2023, 23 Novembru.  Maibé iha despaxu ne’e seidauk fixa Prezidente Autoridade foun ba Bobonaro.

Autoridade Munisipál Bobonaro nu’udar pesoa koletiva direitu públiku, dotada autonomia administrativa, autonomia finanseira, ne’ebé sujeita no tutela ba Ministru Administrasaun Estatál no regula ho estatutu Autoridade Munisipál no Grupu Tékniku Interministeriál bá Desentralizasaun Administrativa, aprovadu hosi Dekretu-Lei númeru 3/2016, 16 marsu, ho redasaun aprovadu hosi Dekretu-Lei númeru 84/2023, 23 Novembru.

Tuir lista ne’ebé Agência TATOLI asesu ne’ebé publika hosi Jornál Repúblika iha loron 30 fulan-janeiru ne’e estrututura autoridade munisípiu ne’ebé sei simu pose mak hanesan; Domingos da Costa asumu kargu Sekretáriu Munisipál Administrasaun no Finansa, Semedo Lacu Costa asume Sekretáriu Munisipál Planeamentu, Investimentu no Dezenvolvimentu Integradu, Júlio dos Santos Caeiro asume Sekretáriu Munisipál ba Asuntu Sosiál no Organizasaun.

António Romano asume kargu Diretór Servisu Munisipál Administrasaun no Rekursu Umanu, Donata Carvalho Marques ezerse Diretora Servisu Munisipál Finansa, Mendes Salvadór asume Diretór Servisu Munisipál Patrimóniu no Lojístika, Egídio Loe Siga asume nu’udar Diretór Servisu Munisipál Aprovizionamentu, Rui Bere Mau Barros nu’udar Diretór Servisu Munisipál Planeamentu Integradu no Dezenvolvimentu.

Rosário Mali dos Santos asumu kargu Diretór Servisu Munisipál Programa Nasionál Dezenvolvimentu Suku, Engracia Soares asume kargu Diretora Servisu Munisipál Apoia Organizasaun Naun Governamentál no Organizasaun Komunitária, Miguel Freitas ezerse nu’udar Diretór Servisu Munisipál Edukasaun, Gil Bernardo Vicente ezerse kargu Diretór Servisu Munisipál Saúde, Rui Manuel Lasi asume kargu Diretór Servisu Munisipál Seguransa Alimentár.

Marcelino Gonçalves Gondinho asume kargu Diretór Servisu Munisipál Obra Públika no Transporte, Gulhermino da Cruz asume Diretór Servisu Munisipál Água, Saneamentu no Ambiente, Longuinhos João asume kargu Diretór Servisu Munisipál Agrikultura, Paulo dos Santosa sume Diretór Servisu Munisipál Jestaun Merkadu no Merkadu Turizmu, Maria de Sousa Verdial Gama asume kargu Diretora Servisu Munisipál Asaun Sosiál, Armindo Vicente nu’udar Diretór Servisu Munisipál Protesaun Sivíl no Jestaun Dezastre Naturál.

Nune’e mós Fransisco Lopes asume kargu Diretór Servisu Munisipál Rejistu, Notariadu no Servisu Kadastrál, Miguel Alcino Mariano nu’udar Diretór Servisu Ajénsia Munisipál Planeamentu, Domingos Viana ezerse funsaun nu’udar Diretór AJénsia Munisipál Fiskalizasaun.

Pedro Laco Buti asumu kargu Administradór Postu Administrativu Atabae, Casimiro dos Santos asume kargu Administradór Postu Administrativu Balibo, Tomás Barreto Henriques nu’udar Administradór Postu Administrativu Bobonaro, Rodolfo da Cruz asume Administradór Postu Administrativu Cailaco, Sebastião Amaral asume Administradór Postu Administrativu Lolotoe no Auousto Caetano asume kargu nu’udar Administradór Postu Administrativu Maliana.

Notísia relevante: Autoridade Bobonaro fahe envelope fiskál 2024 ba diresaun 10 no postu neen

Jornalista: Sérgio da Cruz

Editór: Evaristo Soares Martins