iklan

DESPORTU, DILI, HEADLINE

MJDAK aprova ona fundu ba Karate-do no Atletizmu realiza kampionatu nasionál

MJDAK aprova ona fundu ba Karate-do no Atletizmu realiza kampionatu nasionál

Membru Karate-do hatudu demostrasaun iha ambitu selebrasaun loron Cayman to Cayman, iha edifísiu Sekertáriu Estadu Joventude Desportu (SEJD) Dili, sábadu (17/06). Imajen Tatoli/Francisco Sony

DILI, 05 fevereriru 2024 (TATOLI) – Governu liu hosi Ministériu Juventude Desportu, Arte no Kultura (MJDAK), aprova ona fundu ka orsamentu $12,000 ba modalidade Karate-do no ba Federasaun Timor-Leste Atletizmu (FTLA) hamutuk $22.000 atu realiza kampionatu nasionál hodi prepara atleta kualifikadu bá partisipa eventu nasionál no internasionál sira.

Sekretáriu Jerál Federasaun Karate-do Timor-Leste (FKTL), António Carlos de Araújo, hateten daudaun ne’e halo hela preparasaun ba eventu kampionatu nasionál tanba proposta ba realizasaun ne’e aprova ona hosi MJDAK.

Sekertáriu Jerál Karate-do Timor-Leste, António Carlos de Araújo. Imajen Tatoli/Francisco Sony

“Sim ami hatama ona proposta ba Governu atu hetan apoiu, nune’e ami bele realiza kampionatu nasionál hodi buka fini foun ba Karate-do nian, sé Governu aprova ona ami agradese,” hatete Sekretariu Jerál Federasaun Karate-do Timor-Leste (FKTL) Antonio Carlos de Araujo ba Agência TATOLI iha Jináziu Dili, segunda ne’e.

Daudaun ne’e, FKTL relata ona ba asosiasaun no klube sira iha Munisípiu hotu atu halo preparativu nune’e bele mai kompete.

“Ita seidauk hatene atu halo kampionatu bainhira, maibé iha tempu besik ami bele fó sai, bainhira osan Governu transfere ona mai ami nia konta federasaun, ami foin deside fulan saida mak ami realiza kampionatu ne’e, maibé ami relata ona ba Munisípiu sira atu prepara aan,” hatete António Carlos.

Nune’e, federasaun sei fó sai kalendáriu ba kampionatu nasionál no nia husu ba atleta sira atu prepara aan nafatin.

Kampionatu nasionál ne’e ho objetivu atu haree atleta ne’ebé iha prestasaun federasaun sei hili sai nu’udar atleta selesaun nasionál hodi reprezenta Timor -Leste iha jogu SEA Games 2025 Thailándia.

Daudaun,  totál atleta selesaun nasionál efetivu ne’ebé rejistu iha baze dadus FKTL nian na’in 1000-resin.

Orsamentu hosi KRAM ba Karate-do

“Orsamentu hosi Komisaun Reguladora Arte Marsiál (KRAM) ami hetan iha tinan kotuk, ami konsege ezekuta hotu ona no submete ona relatoriu ba (KRAM),” hatete Sekretariu Jerál ne’e.

Orsamentu ne’ebé KRAM aloka ba Karate-do iha tinan kotuk hamutuk rihun $130-resin ba tinan tolu no Karate-do konsege simu ona 40% iha tinan kotuk no hela 60% sei iha prosesu..

“Hosi osan númeru ne’e ami simu ona 40% hamutuk rihun $21, seluk seidauk sei iha hela prosesu nia laran, rihun $21 ne’ebé ami simu iha tinan 2023 ne’e mak konsege hadia ami nia edifisiu iha Koni ne’e, selu funsionariu ne’ebé servisu administrasaun iha federasaun, hola ami nia fasilidade servisu administrasaun nian, relatoriu ami halo hotu ona submete ona ba KRAM,” nia konklui.

Atletizmu realiza kampionatu nasionál 

Iha fatin ketak, Prezidente Federasaun Timor-Leste Atletizmu (FTLA), Afrânio Xavier Amarál, mós informa realiza kampionatu nasionál iha abríl tanba hetan ona aprovasaun orsamentu ho totál $22.000 hosi MJDAK.

Prezidente Federasaun Atletizmu Timor-Leste (FTA) Àfranio Xavier Amaral. Imajen Tatoli/Francisco Sony

“Ami preparadu ona sei realiza kampionatu nasionál iha fulan abríl, fatin ba kampionatu nasionál sei hala’o iha Glenu Munisípiu Ermera tanba edifisiu atletizmu iha Glenu,” hatete Prezidente ne’e.

Nia dehan, federasaun alerta ona ba asosiasaun Munisípiu hotu atu prepara atleta nune’e bele kompete iha kampionatu nasionál ne’e.

“Atleta hosi Munisípiu hotu, ami deside ona total atleta hamutuk na’in 80 mak sei kompete iha eventu ne’e, eventu ne’e atu buka fini atleta bainhira iha prestasaun di’ak federasaun hili atu nune’e bele ba kompete iha eventu internasionál sira,” hatete Afrânio.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!