PAM hakarak dezenvolve Ainaro sai sidade furak no moos
DILI, 05 fevereiru 2024 (TATOLI)—Prezidente Autoridade Munisípiu (PAM) Ainaro, Manuela Carmo Bucar Corte-Real, hafoin simu pose, iha tempu badak hakarak serbisu hamutuk ho komunidade lokál hodi dezenvolve munisípiu Ainaro sai sidade furak no moos.
“Ko’alia kona-ba planu prioridade iha barak, maibé tempu badak sei organiza komunidade hotu halo limpeza iha ida-idak ninia uma oin, fatin públiku no seluk tan hodi halo Ainaro sai sidade ka ambiente furak no moos,” PAM Ainaro informa ba Agência Tatoli, via telefónika segunda ne’e.
PAM sei la serbisu mesak atu konkretiza inisiativa hirak ne’e, maibé sei koopera ho parte hotu, liu-liu komunidade hodi hala’o atividade tanba Ainaro hanesan fatin malirin no rai prodututivu, nune’e sei organiza komunidade ida-idak kuda ai-funan no animál tenke kesi hotu nune’e halo munisípiu ne’e sai matak no furak.
Daudaun Manuela foka uluk hodi organiza komunidade halo limpreza tanba planu prioridade sira seluk presiza orsamentu naton.
“Hafoin simu pose sai nu’udar ba PAM Ainaro, ha’u-nia prioridade boot mak sei haree didi’ak ba ezekusaun orsamentu aprovadu ona mai munisípiu Ainaro atu organiza didi’ak nune’e bele ezekuta ho di’ak no kualidade,” nia akresenta.
Notísia relevante : Governu nomeia Prezidente Autoridade foun Ainaro, Manatutu no Manufahi
Razaun fó prioridade liu ba ezekusaun orsamentu tanba iha planu barak maibé bainhira la hatene ezekuta orsamentu maka planu sira sei la ezekuta ho di’ak.
“Orsamentu tinan ne’e ne’ebé aloka iha munisípiu Ainaro la sufisiente atu hatan ba kestaun sira ne’ebé iha, entaun agora ami haree atu prepara planu prioridade di’ak ba dezenvolvimentu munisípiu iha tinan 2025, ne’ebé ami sei prepara,” nia tenik.
Aleinde ne’e, Ainaro mós iha Konsellu Konsultivu Munisipál ne’ebé sai hnesan meiu atubele hetan informasaun no kestaun barak ne’ebé bele konsidera iha planu tinan 2025.
Daudaun administraun Ainaro halo ona koordenasaun ho Ministériu Turizmu no Ambiente (MTA) liga ho planu prioridade ministériu ba sítiu turizmu iha Ainaro, maibé atu dezenvolve turizmu komunitáriu labele muda orijinalidade fatin ne’ebé sai objetu turizmu ne’e rasik.
“Turizmu komunitáriu ne’e ita fa’an natureza ne’ebé eziste furak sai hanesan objetu turizmu, maibé ami mós sei koordena ho ministériu atu hetan dadus turizmu liga ba turizmu relijiozu, natureza no rezisténsia atu ita dezenvolve hamutuk hodi atrai turista sira iha rai-laran no rai-li’ur,” PAM esplika.
Enkuantu, nasionál atribui ona kompeténsia balun ba munisípiu, nune’e presiza prepara rekursu umanu atubele simu responsabilidade no ezekuta tuir hodi implementa ho di’ak.
Orsamentu tinan 2024 ne’ebé aloka ba munisípiu Ainaro hamutuk millaun $4,3-resin, ne’ebé kobre ona ba edukasaun, saúde inklui servisu munisipál ne’ebé daudaun Governu sentrál atribui ona kompeténsia ba munisípiu.
Jornalista : Arminda Fonseca
Editora : Julia Chatarina
