DILI, 05 fevereiru 2024 (TATOLI)-–Sekretaria Estadu Kooperativa (SEKoop) rejista tan federasaun kooperativa kréditu uniaun ida hanaran Kréditu Uniaun Leno Dalan Timor-Leste (FENACU-LENDA-TO.l, Coop).
Nune’e, Sekretáriu Estadu Kooperativa, Arsénio Pereira da Silva, segunda ne’e, fó pose ba estrutura federasaun hodi formaliza no ba oin bele hala’o atividade.
Biban ne’e, governante ne’e dezeju estrutura bele serbisu maka’as no serbisu ho ekipa hodi tau-matan ba kooperativa hamutuk 18 ne’ebé hamahan-an iha federasaun ne’e.
“Apresia ba ideia no hanoin di’ak hosi grupu kooperativa sira tanba ho kriasaun federasaun bele dezenvolve di’ak liután kooperativa iha Timor. Tanba Konstituisaun fó dalan ba movimentu kooperativa sira atu harii federasaun nomós konfederasaun atubele liga kooperativa nível rejionál no internasionál,” Arsénio hateten hafoin fó pose ba estrutura federasaun, iha Hotel Timor.
Notísia relevante : Federasaun Hanai Malu Halibur Ona Osan Millaun $5,6
Sekretáriu Estadu kompromete SEKoop sei sai parseiru permanente FENACU-LENDA no kooperativa sira seluk.
“Ha’u sei akompaña atividade hotu hodi enkoraja bele aumenta tan membru kooperativa sira ne’ebé hamahan-an iha federasaun ne’e. Tanba SEKoop iha diresaun própriu hodi kolabora kooperativa sira tanba dezenvolvimentu kooperativa hola parte hosi kontribuisaun ba dezenvolvimentu ekonomia nasaun tanba setór kooperativa nu’udar pilár importante iha país,” nia akresenta.
Antes ne’e, SEKoop rejista federasaun hamutuk haat hanesan Federasaun Hanai Malu, Federasaun Peska, Federasaun Multi Setorál Tokodede, no Federasaun Agríkola no kooperativa hamutuk 219.
Iha biban hanesan, Prezidente FENACU-LENDA, João Manuel Belo, hateten, federasaun ne’e foin harii iha tinan 2024, ne’ebé antes ne’e realiza asembleia jerál hili estrutura iha loron 17 janeiru 2024. Federasaun ne’e harii ho vizaun hakarak kria kooperativa sekundária ne’ebé forte, transparente, sustentável no reziliénte.
“Ha’u espera katak ita hotu hamutuk hodi hamriik metin luta ba sustentabilidade kooperativa hodi halo jestaun di’ak maski ita rasik preokupa ho atividade seluk tanba ita kompromete ona katak prontu atu serbí ho onestidade,” Jerente federasaun tenik.
Jornalista : Antónia Gusmão
Editora : Julia Chatarina
