iklan

NASIONÁL, HEADLINE, POLÍTIKA

Governu nomea Jorge Alves lidera AMRT I.P

Governu nomea Jorge Alves lidera AMRT I.P

Turista sira hosi Austrália ho Ró kruzeiru Le Lapérouse vizita AMRT Dili, kinta (15/09/2022). Imajen Tatoli/António Daciparu

DILI, 06 fevereiru 2024 (TATOLI)–Primeiru-Ministru (PM), Kay Rala Xanana Gusmão, aprezenta projetu rezolusaun Governu hodi nomea Jorge Alves nu’udár Diretór Ezekutivu Arkivu no Muzeu Rezisténsia Timorense (AMRT, I.P) ba mandatu tina-haat, iha reuniaun Konsellu Ministru estraordinária, tersa ne’e.

“Desizaun ida-ne’e mosu hafoin Diretór Ezekutivu sesante termina mandatu iha fulan-outubru liubá, nune’e mandatu ba membru atuál diresaun inklui Diretór Ezekutivu anteriór ‘Hamar’ Antoninho Baptista,” Vise Ministru Asuntu Parlamentár, Adérito Hugo da Costa, hateten liuhosi konferénsia imprensa, hafoin reuniaun ezekutivu, iha Palásiu Governu.

Notísia relevante : Kaixa klandestina ualu iha Oé-Cusse entrega dokumentu rezisténsia ba AMRT, IP

Governante ne’e dehan, maski ‘Hamar’ Antoninho Baptista hala’o papél importante hodi kria no jere AMRT, maibé Governu fiar katak daudaun ne’e hanesan tempu apropriadu atu hahú faze foun ida no introdús perspetiva inovadora ho lideransa Jorge Alves nian, ne’ebé hanesan veteranu no antigu kombatente rezisténsia, ne’ebé ninia perfíl, koñesimentu no esperiénsia kualifikadu hodi asume funsaun iha servisu públiku.

Governu mós hato’o ninia louvór no apresiasaun ba servisu ne’ebé Diretór Ezekutivu sesante hala’o ona durante tempu barak.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!