Membru PN husu MOP normaliza Mota Laclolema no Aidenu

DILI, 06 fevereiru 2024 (TATOLI)—Membru Parlamentu Nasionál (PN), husu Ministériu Obra Públika (MOP) tau atensaun atu normaliza mota Laclolema iha Liquiça no mota Aidenu iha Ermera tanba iha tempu udan ne’e ameasadu.
Kestaun ne’e hato’o liuhosi Deputadu CNRT, Leandro Lobato, Marcos Soares Martins, Deputada FRETILIN, Lidia Norberta ho Deputada PD, Rozenha Martins, iha reuniaun plenária PN, tersa ne’e.
“Horisehik ha’u ba direita iha ne’eba munisípiu Liquiça iha mota ida Laclolema ne’e fó hela ameasa sub-estasaun olipezadu iha ne’eba no iha mós populasaun iha ne’eba ho família uma-kain 100-resin. Situasaun ne’e fó ameasa, nune’e Governu presiza halo intervensaun imediatu,” Deputadu CNRT, Leandro Lobato, levanta kestaun ne’e iha plenária.
Deputadu FRETILIN, Lídia Norberta, sekunda ho preokupasaun mota Laclolema no antes ne’e nia-parte levanta ona tanba antes ne’e hala’o kontaktu eleitorál iha baze haree direta no rona preokupasaun komunidade nian presiza hetan intervensaun.
Deputada PD Rozenha Martins hato’o preokupasaun iha Gleno-Ermera iha mota Aidenu suku Talimoro, sai ameasa boot ba populasaun no estudante atu fasilita komunidade nia atividade loro-loron liuliu ba estudante sira bainhira mota boot sira labele ba eskola.
Entretantu, Nia dehan ponte Aidenu ne’e sai ponte alternativa ba komunidade Ermera Villa, postu administrativu Hatulia B, suku Tailoro, Poetete no Ponilala.
“Ne’eduni ba Ministériu Obra Públika (MOP) atu haree ponte urjente ba fasilita lalais sira-nia atividade loro-loron nian,” nia dehan.
Deputadu CNRT, Marcos Soares Martins, sekunda mós ho prekupasaun mota Aidenu, nune’e nia agradese ba Deputada PD ne’ebé sai duni lian hosi povu Ermera nu’udar Ermera oan levanta preokupasaun ne’e iha plenária hodi bolu atensaun Governu nian.
Aleinde ne’e, Deputadu hosi bankada Governu ne’e husu MOP bele aselera konstrusaun ba estrada hosi Gleno ba Ermera tuan, no hosi Gumboe ba Letefoho no hosi Mertutu ba Hatulia A, ho nune’e bele responde preokupasaun populasaun nian.
Entretantu iha reuniaun plenária ohin, Vise Ministru ba asuntu Parlamentár, Adérito Hugo da Costa, la marka prezensa tanba partisipa reuniaun Konsellu Ministru (KM) extraordináriu, maibé tékniku sira rejista preokupasaun Deputadu sira.
Jornalista : Nelson de Sousa
Editór : Cancio Ximenes

