VIQUEQUE, 06 fevereiru 2024 (TATOLI)— Ministériu Saúde (MS), estende ona kontratu ba pesoál saúde no funsionáriu administrasaun na’in-16 hodi kontinua servisu no fó atendimentu ba pasiente sira iha fasilidade saúde sira munisípiu Viqueque.
Pesoál saúde no funsionáriu administrasaun ne’ebé nia kontratu termina iha 31 dezembru 2023 no asina hikas fali ona kontratu hanesan parteira na’in-rua, enfermajen ida, motorista ba ambulánsia multidusaun ida, pesoál saúde ba nutrisaun na’in-lima, pesoál limpeza na’in tolu, pesoál finansa na’in-tolu no segunsa na’in-ida.
“Ministériu Saúde (MS) estende kontratu ba pesoál saúde no funsionáriu administrasaun na’in-16 hodi fila-fali bá sira servisu iha sira nia fatin, ne’ebé antes ne’e sira serbisu bá”, Diretór Servisu Saúde Munisípiu Viqueque hatete ba Agência TATOLI,I.P iha postu Viqueque Vila, tersa ne’e.
Daudaun ne’e, nia dehan koloka fila-fali ba sira nia fatin hanesan ba postu saúde Fatudadere, sentru saúde Uatucarbau, motorista ambulánsia multifusaun ba sentru saúde Ossu, enfermajén ida koloka ba postu saúde Uaimori, nutrisaun na’in-lima koloka ba sentru saúde lima ne’e.
Maske, nia dehan antes ne’e Servisu saúde munisípiu Viqueque propoin ba Governu liuhosi Ministra Saúde atu estende kontratu ba pesoál saúde 102, maibé Ministra Saúde deside estende de’it kontratu ba pesoál médiku na’in-16 nian.
“Ida-ne’e, polítika Ministra Saúde nian, maibé estende kontratu ba pesoál saúde 16 ne’e ladun sufisiente atu halo atendimentu ba pasiente sira iha munisípiu Viqueuqe”, nia afirma.
Daudaun ne’e, nia informa postu saúde Uetali, postu saúde Bibileo no postu saúde Saneau, postu Lacluta laiha pesoál saúde atu halo atendimentu ba komunidade sira.
“Maibé, ba postu saúde sira ne’ebé mamuk ami destaka ona pesoál saúde permanente no ami halo atividade movél klínika hodi tama no sai ba postu saúde hodi halo atendimentu ba ita-nia komunidade sira. Nune’e ami-nia esperansa tempu badak ministériu bele prosesa mós kontratadu sira-ne’ebé ami propoin ba hodi ba fali postu saúde sira”, nia afirma.
Jornalista: Vitorino Lopes da Costa
Editór : Florencio Miranda Ximenes
