MS sujere negosiante faan hahan tasak iha dalan ninin garante ijiene
DILI, 06 fevereiru 2024 (TATOLI)–Diretora Nasionál Edukasaun Promosaun iha Ministériu Saúde, Emilia de Jesus Mendonça, sujere ba negosiantes faan hahan tasak iha dalan ninin ka públiku atu prepara hahan tenke saudável no garante ijine.
Diretora ne’e apela ba negosiante sira nakait ho hahan tasak ne’ebé estraga no ema halo publiksaun iha sosiál mídia, nune’e husu atu negosiantes sira uza Mama Lemon hodi fase instrumentu ba tein atu garante ijene ba saude ema nian.
“Ami hakarak fahe informasaun ba negosiante sira faan hahan iha merkadu, dalan ninin, eskola no públiku katak ita buka fó moris ba familia, labele lori fali negósiu fó moras ba ema seluk, ida ne’e mak importante. Se ita hakarak ita-nia negosiu seguru ba konsume públik no ita-nia negósiu ne’e lao ba oin, ita prepara ho didi’ak no seguru.” Diretora Emilia de Jesus Mendonça hateten ba jornalista sira iha Caicoli.
Diretora ne’e hateten, Governu la bandu atu tein no faan iha dalan ninin maibé tenke prepara hahan ho moos, tamba faan iha dalan ninin ne’e fó risku ba saúde públik tanba iha movimentu barak no poluisaun.
Nia dehan, MS fahe informasaun liuhosi rede sosiál kona-ba preparasaun saudável no kapasitasaun ka formasaun ba negosiante sira hosi restaurante no negosiante faan hahan tasak iha dalan ninin.
Ministériu Saúde ho Ministériu Edukasaun promove oinsa preparasaun ba merenda eskolár saudavel no liuhosi programa 5S hanesan Starvart (Hamlaha), Soil-Transmitted Helminthiasis (Lombriga ne’ebé da’et hosi rai), Skin Diseases (moras kulit), Smoking and sugar/Alcoholic Drinks (fuma no bebida/Alkol sira).
Jornalista : Jesuína Xavier
Editór : Cancio Ximenes
