iklan

COVALIMA, HEADLINE

Agrikultór 130 iha Tilomar simu subsídiu ba implementasaun Programa “Ho Musan Ida Rai Matak”

Agrikultór 130 iha Tilomar simu subsídiu ba implementasaun Programa “Ho Musan Ida Rai Matak”

Agrikultór sira iha Tilomar simu subsídiu ba implementasaun Programa “Ho Musan Ida Rai Matak”.

COVALIMA, 07  fevereiru 2024 (TATOLI) – To’os-na’in hamutuk 130 iha Tilomar simu subsídiu ba implementasaun Programa Ho Musan Ida Rai Matak, iha Postu Administrativu Tilomar ne’ebé kada ai-hun ida hetan sentavu 0.50. Pagamentu ba subsídiu ne’e halo husi Sentru Komunidade Covalima  (CCC, sigla portugés).

Agrikultór sira ne’e kuda ona ai-mahoni hamutuk 37.843 ne’ebé simu subsídiu ho totál $18.921.50 (tanba kada ai selu sentavu 0,50) no programa ne’e implementa ona dezde 2019.

Área implementasaun ba projetu refere iha postu Tilomar iha suku Lalaua, iha aldeia Bitis, Halimea, Kota Foun no Tulaeduk. Aleinde ne’e, iha suku Beiseuk iha aldeia Baer Foholulik, Maubese, Wala, Nikir no Fatuk Metan, nomós iha suku Casabauk iha aldeia Tabolo, Koloama no Kawauman.

Koordenadór Ho Musan Ida Rai Matak, Januário de Fátima, dehan implementasaun projetu ne’e atu dezenvolve ekonomia komunidade nian, liuliu iha área rurál liuhusi atividade reflorestasaun iha área degradasaun hodi kria karbonu liuhusi kuda ai-horis.

“Ita implementa programa refere atu hasa’e ekónomia família iha área rurál hodi konserva no proteje rekursu naturál”, Januário de Fátima dehan iha Tilomar, ohin.

Programa ne’e hahú implementa iha 2010 iha postu administrativu Baguia iha munisípiu Baucau n habelar bá Tilomar iha Covalima, iha 2017, maibé nia implementasaun loloos iha 2019.

Programa ne’e hetan apoia finanseira husi Uniaun Europeia, Oxfam Australia no Friends of Suai no hetan apoiu tékniku husi Fundasaun Xpand iha Austrália no implementa husi CCC.

Jestór Programa Rai Matak husi Oxfam, Sérgio Barreto, dehan pagamentu ba subsídiu ne’e foin realiza ba to’os-na’in sira iha postu Tilomar no munisípiu seluk finaliza ona.

Agrikultór Januário Barreto agradese ba Sentru Komunidade Covalima hodi implementa Programa Ho Musan Ida Rai Matak  ne’ebé fó benefísiu ba populasaun la’ós haree de’it ba osan, maibé bele hamatak postu Tilomar.

Liuhusi programa refere bele konserva bee-matan tanba durante ne’e komunidade iha Tilomar sempre halerik ba bee-moos, nomós redús risku dezastre naturál hanesan rai-halai.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!